Həbsdə koronavirusa yoluxan daha bir icra başçısı süni nəfəs aparatına qoşulub.
Biləsuvar rayon İcra Hakimiyyətinin keçmiş başçısı Mahir Quliyevin vəziyyəti ağrdır.
Bu barədə M.Quliyevin vəkili Leyla Məmmədova məlumat verib.
Vəkil bildirib ki, Dövlət Gömrük Komitəsinin İxtisaslaşmış Hospitalında müalicə alan keçmiş icra başçısının vəziyyəti daha da ağırlaşıb. Ağzından və burnundan nəfəs ala bilmədiyi üçün o, IVL süni nəfəs aparatına qoşulub.
Qeyd edək ki, Mahir Quliyev 2006-2011-ci illərdə Astara rayon İcra Hakimiyyətinin, 2011-2020-ci illərdə Biləsuvar rayon İcra Hakimiyyətinin başçısı olub. O, Dövlət Təhlükəsizliyi Xidmətinin əməkdaşları tərəfindən 2020-ci il aprelin 29-da saxlanılıb və məhkəmənin qərarı ilə barəsində həbs qətimkan tədbiri seçilib.
M. Quliyev aprelin 30-da Biləsuvar Rayon İcra Hakimiyyətinin başçısı vəzifəsindən azad edilib.
Hazırda keçmiş icra başçısı barəsində Cinayət Məcəlləsinin 179-cu (mənimsəmə və isriaf etmə), 308.1-ci (vəzifə səlahiyyətlərindən sui-istifadə etmə), 311.3.2-ci (təkrar rüşvət alma) və 313-cü (vəzifə saxtakarlığı) maddələri ilə başlanmış cinayət işinə Lənkəran Ağır Cinayətlər Məhkəməsində baxılır.