Bu gün səhər saat 9 radələrində Nizami Rayon Polis İdarəsinin Post Patrul Xidmətinin əməkdaşı, 1988-ci il təvəllüdlü İ. Məmmədov həyat yoldaşı Xanım Məmmədovanı qətlə yetirib.
Qətllə bağlı bəzi məlumatlar əldə edilib. Belə ki, iki azyaşlı uşaq anası, 26 yaşlı X. Məmmədova 24-cü Polis Şöbəsinə gələrək əri, Post Patrul Xidmətinin serjantı İsmayıl Məmmədov tərəfindən tez-tez döyüldüyünü bildirərək ondan şikayət edib.
İ. Məmmədov xidmətdə olarkən həyat yoldaşının ondan 24-cü Polis Şöbəsinə şikayətə gəldiyi barədə məlumat alıb. O, dərhal şöbəyə gəlib. Arvadının şöbədə izahat yazdığını öyrənən İsmayıl Məmmədov təhqiqatçının otağına daxil olub. Bu zaman ər-arvad arasında mübahisə düşüb. Daha sonra İ. Məmmədov üzərindəki xidməti tabel silahı ilə arvadına ard-arda 15 dəfə atəş açıb. Bədəninin müxtəlif nahiyələrindən 7 güllə yarası alan qadın hadisə yerindəcə keçinib.
Hadisə zamanı ailənin azyaşlı övladları da anasının yanında olub.
Hadisədən sonra İ. Məmmədov saxlanılıb.
Faktla bağlı Baş Prokurorluğun İstintaq İdarəsində Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə cinayət işi başlanıb və İsmayıl Məmmədov şübhəli şəxs qismində istintaqa cəlb edilib.
Qətlə yetirilən Xanım Məmmədovanın xalası Nəsibə Məmmədova bildirib ki, İsmayıl Məmmədov qısqanc biri olub:
“Biz heç vaxt onların ailəsinə qarışmadıq. Mən Bakıda yaşasam da, bacım qızı evlənəndən sonra heç vaxt bizə gəlməyib. Mənə telefon nömrəsini də verməyiblər. İ.Məmmədov onu heç vaxt evdən buraxmırdı. Bacım qızı Bakı Dövlət Universitetinin Riyaziyyat fakültəsini bitirib. Onlar ikinci kursdan tanış oldular, nişanlandılar. İki uşaqları var. Biri qız, biri oğlan. Böyük uşaqları bu il birinci sinfə getdi”.
Xalanın sözlərinə görə, bacısı hadisədən xəbərsizdir:
“Yoldadır, gəlir, elə bilir yaralıdır”.
Qeyd edək ki, qətli törədən İsmayıl Məmmədov əslən Xocalı rayonundandır. Atası Məmmədov Vaqif Şəmil oğlu Xocalı soyqırımı zamanı həlak olan sakinlərdən biridir.