2012-ci ilə qədər Kremldə işləyən aşbaz Jerome Rigaud “Paris Match” jurnalına verdiyi müsahibədə Rusiya prezidenti Vladimir Putinin kulinariya zövqlərinin bəzi sirlərini açıb.
J. Rigaud deyib ki, Putin üçün ət birinci yerdədir. Rusiya Təhlükəsizlik Şurası sədrinin müavini Dmitri Medvedev isə kəmşirin sous altında balığa üstünlük verir.
Aşbaz dövlət sirrini aça bilmədiyi üçün bütün detalları açıqlaya bilməyəcəyini deyib və bildirib ki, Putinin yeməkləri üçün ərzaqlar çox ciddi yoxlanışdan keçirdi. Hətta prezidentin süfrəsini açmaq üçün həkim və hərbçilərin nəzarəti altında icazə gözləməli olurdu.
Jerome Rigaud Rusiyada işinin çətin və sirli olduğuna baxmayaraq orada işləməyin çox xoşuna gəldiyini bildirib:
“Bilirsiz, ruslar çox sadə və açıq insanlardır. Saatlarla masa arxasında oturub uzun söhbət edə bilərlər. Onlar yeməyə araqla başlaya bilərlər və sonra bütün yeməklərin dadını baxa bilərlər. Onlar çörəyə xüsusi hörmət edirlər, çünki aclıq keçirdiklərini xatırlayırlar”.
Daha əvvəl “Kremlyovski” ərzaq kombinatının direktoru vəzifəsini tutan Viktor Belyaev isə SSRİ və Rusiya başçılarının üstünlük verdiyi şorbalardan danışıb. O, Stalinin masada yağlı ət bulyonları, xarço və ya solyanka verilməsini tələb etdiyini qeyd edib. Brejnev borş və taxıl ilə qoyun ətindən hazırlanmış şorbalara üstünlük verdiyini, bu gün prezident Vladimir Putin isə ən çox şorba-püre və balıqdan hazırlanmış şorbalara – uxaya üstünlük verdiyini bildirib.