Milli Məclisin deputatı Nigar Arpadarai Azərbaycanda bir çox yerlərdə COVID pasportunun tələb edilməsini tənqid edib.
N.Arpadarai COVID pasportunun tətbiqinə şübhə ilə yanaşdığını bildirib. də edib:
“İndiki mərhələdə bir sual yaranır – COVID pasportunun tətbiqinə ehtiyac varmı? Azərbaycanda hal-hazırki məhdudiyyətlər epidemioloji, iqtisadi və hüquqi baxımdan məqsədə uyğundurmu?! COVID virusunu öncə keçirmiş, antikoru olan insanlardan peyvəndi təsdiq edən sənəd (COVID pasportu) tələb edilməlidirmi? Axı bu insanlarda yenidən yoluxma ehtimalı demək olar ki, sıfıra yaxındır (bunu beynəlxalq araşdırmalar göstərir). Peyvəndi artıq virusu keçirmiş birinə sərf etmək heç bir praktik nəticə verməyən, enerji, pul və vaxt itkisidir, səhiyyə sisteminə yükdür.
Üstəlik, Azərbaycanda peyvənd olunanların və virusa yoluxanların (antikor olanların) sayı çoxdur. COVID pasportunun yoxlanması ticarət mərkəzlərində və restoranlarda insanları infeksiyadan qorumağın yoludurmu?! “Vaksin olunanlar xəstəliyi daha asan keçirir” arqumenti var, amma COVID pasportu olanlar belə digərlərini yoluxdura bilər, ona görə bu məhdudiyyətin “kollektiv fayda” məntiqi mövcud deyil, çünki peyvəndlənmiş insan özü xəstəliyi asan keçirsə belə digərlərini yoluxdurur”.
Deputat qeyd edib ki, peyvənd olunmuş insanlar da xəstələnirlər:
“Bu, o deməkdir ki, restorana gələn hər kəsin əlində COVID pasportunun olması sizin yoluxmamağınız demək deyil. Amma iqtisadiyyat və biznes sahələri bundan əziyyət çəkir. Zənnimcə, indi daha önəmli sual budur – COVID -19 virusuna yoluxmaların davam etdiyi bir zaman səhiyyə sistemimiz təzyiq altında işləməyə öyrəşdimi?
Bu suallar ölkədə neçə adamın COVID pasportu sahibi olması sualından daha əhəmiyyətlidir. COVID pasportunun tətbiqinin məqsədəuyğunluğu isə məndə hələ də sual doğurur”.
N.Arpadarai onu da qeyd edib ki, Böyük Britaniya izdihamlı yerlərin girişində COVID pasport yoxlamaları tətbiq etmək planlarından imtina edib, Danimarkada isə bütün karantin məhdudiyyətləri ləğv olunub.