Ağstafa rayonunun keçmiş icra başçısı, həbsdə olan Nizaməddin Quliyev bu gün vəfat edib.
Bu barədə N.Quliyevin oğlu, Ramin Quliyev məlumat verib. O, 67 yaşlı atasının dünən COVID-19-dan dünyasını dəyişdiyini deyib.
Danışmaqda çətinlik çəkən R.Quliyev atasının sabah Goranboyun Tapqaraqoyunlu kəndində dəfn olunacağını bildirib. R.Quliyev mövcud vəziyyətlə əlaqədar dəfndə yalnız yaxınların iştirak edəcəyini deyib.
Qeyd edək ki, Nizaməddin Quliyev Dövlət Təhlükəsizlik Xidmətinin keçirdiyi əməliyyat zamanı saxlanılmışdı. O, vəzifə səlahiyyətlərindən sui-istifadə etməkdə təqsirləndirilirdi.
Bu ilin avqustun 7-də Gəncə Ağır Cinayətlər Məhkəməsində keçirilən məhkəmə zamanı N.Quliyev 8 il 6 ay müddətində azadlıqdan məhrum edilmişdi.
Xatırladaq ki, Nizaməddin Quliyev 2009-2019-cu illərdə Goranboy rayon İcra Hakimiyyətinin başçısı vəzifəsində çalışıb. Prezidentin 5 aprel 2019-cu il tarixli sərəncamı ilə Goranboy rayon İcra Hakimiyyətinin başçısı vəzifəsindən azad edilən N.Quliyev Ağstafa rayon İcra Hakimiyyətinin başçısı təyin edilmişdi.