Azərbaycanda məktəblərdə əyani təhsilin başlayacağı tarix açıqlanıb.
Bu barədə təhsil naziri Emin Əmrullayev bu gün keçirdiyi brifinqdə məlumat verib.
E.Əmrullayev bildirib ki, növbəti tədris ilində Azərbaycan təhsili əyani, ənənəvi təhsil formasına qayıdır:
“Sentyabrın 22-dən ibtidai siniflər, sentyabrın 29-dan 5-11-ci siniflər və orta ixtisas təhsil müəssisələri ənənəvi təhsilə qayıdır”.
Təhsil naziri dərslərin əyani formada, həftədə 5 dəfə, bəzi məktəblərdə isə 6 dəfə keçiriləcəyini bildirib.
Brifinqdə çıxış edən təhsil nazirinin müşaviri Rüstəm Ağayev isə deyib ki, məktəblərdə şagirdlərin maska taxması ilə bağlı hər hansı məcburiyyət yoxdur, bu, valideynlərin qərarından asılı olacaq.
R.Ağayev onu da bildirib ki, yeni tədris ilinin başlanması ilə bağlı hər bir təhsil müəssisəsində operativ nəzarət üzrə məsul şəxslər təyin olunub:
“Həmin şəxslər hərarətin ölçülməsi və dezinfeksiya işləri ilə məşğul olacaq. Əgər məktəbə daxil olan şəxsin hərarəti 37-dən artıqdırsa, müəssisəyə buraxılmayacaq. Dərs vaxtı kiminsə hərarəti qalxarsa, izolyasiya otağına yerləşdiriləcək. Şagirddirsə, valideyninə, böyük şəxsdirsə, səhiyyə müəssisəsinə məlumat veriləcək. Məktəbdə yoluxma aşkarlanarsa, Gigiyena və Epidemiologiya Mərkəzinə məlumat veriləcək, onların iştirakı ilə araşdırma aparılacaq”.
Brifinqdə o da bildirilib ki, məktəbəqədər hazırlıq qrupları oktyabrın 1-dən fəaliyyətə başlayacaq.
Ali təhsil müəssisələrinin də sentyabrın 29-dan əyani formada tədrisə başlayacağı qeyd edilib.
