Türkiyə mətbuatının məlumatına görə Antalya şəhərindən sonra Muğla bölgəsində genişmiqyaslı meşə yanğınları başlayıb.
Muğlanın Marmaris mahalında bu saatlarda bilinməyən səbəblərdən başlayan yanğın genişlənməyə davam edir. Yanğının bölgədə yaşayış məntəqələrinə 100 metrə qədər yaxınlaşdığı və digər bölgələrdən mərkəzə gedən yolun bağlandığı bildirilir.
Türkiyənin Təsərrüfat və Meşə naziri Bəkir Pakdəmirli sosial şəbəkə hesabında yanğının söndürülməsinə 30 yanğınsöndürən maşın, 5 helikopter və bir təyyarənin cəlb edildiyini açıqlayıb.
Bodrumda başlayan yanğın məşhur “Titanic Otel”ə keçib.
Məlumata görə oteldə olan qonaqlar dəniz yolu ilə ərazidən çıxarılıb. Yanğının söndürülməsinə 2 helikopter və 20 suçiləyici cəlb edilib.
Bölgədə quru yolu bağlanıb, yalnız yanğınsöndürənlərin girişinə icazə verilir.
Qeyd edək ki, Marmarisdə iyunun 27-də elektrik verilişi xətlərində yanğın baş vermişdi və 35 hektar əraziyə ziyan vurmuşdu. Bu gün başlayan yanğın isə hadisə yerindən təxminən 300 metr məsafədə yayılıb.