Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə “Yeni Sabah” saytını məhkəməyə verib.
Saytın baş direktoru Elnur Məmmədlinin sözlərinə görə, iddiaya səbəb 24.02.2021-ci il tarixində Yenisabah.az-da dərc olunmuş “Şeyx lisenziya üçün rüşvət istəyir – ŞOK İDDİA” başlıqlı yazı olub.
Yazıda Qazax rayonundan olan Xədicəxanım Hüseynzadə yeni tikdikləri Tövbə məscidinin qeydiyyata alınmamasından danışıb. O, açıqlamasında deyib ki, məscidin sənədləşməsi üçün QMİ-də mühüm vəzifədə çalışan Əlirza adlı şəxs onlara söz verib və əlavə 2000 min manat pul tələb olunub.
E.Məmmədlinin bildirdiyinə görə, sözügedən məqalə “Yeni Sabah”da RegionNews.az saytına istinadən dərc olunub. Açıqlama verən xanımın danışdıqları video formatında yazıya əlavə olunub.
E.Məmmədli “Kütləvi informasiya vasitələri” haqqında qanunun 62-ci maddəsini xatırladaraq iddianın əsassız olduğunu deyib: “Həmin maddəyə əsasən “digər kütləvi informasiya vasitələrindən götürülmüş və təkzib olunmamış” xəbərin yayılmasına görə redaksiya heç bir məsuliyyət daşımır.
QMİ-nin qaldırdığı iddia üzrə Sabunçu rayon məhkəməsində hakim Tahirə Əsədovanın sədrliyi ilə keçirilən iclasda dünən yekun qərar qəbul olunub. Məhkəmənin qərarına əsasən QMİ-nin iddiası təmin edilib.
Hakim qərarında qanuna deyil, QMİ-ni məhkəmədə təmsil edən nümayəndəsinin “RegionNews.az KİV deyil, ona görə ki, rəsmi qeydiyyatdan keçməyib” kimi absurd ifadəsinə əsaslanıb.
E.Məmmədli bildirib ki, qanunda KİV-də yayılmış məlumatlara görə istinad materialları məsuliyyətdən azad olunur. Sizin istinad etdiyiniz mənbə isə rəsmi qeydiyyata alınmadığı üçün KİV deyil. Siz də KİV olmayan mənbəyə istinad etdiyinizdən məsuliyyətdən azad olunmursunuz” kimi cümlə quraraq hökm verib.
Məhkəmənin bu absurd qərarı ilə bağlı “Yeni Sabah” apelyasiya şikayəti verəcək”.