Dövlət Təhlükəsizliyi Xidmətinin əməkdaşları vəzifəli şəxslərin İkinci Qarabağ müharibəsi iştirakçılarına maliyyə təminatı haqqında sənəd vermək üçün rüşvət tələb etməsi haqqında məlumatla bağlı araşdırma aparıb.
Dövlət Təhlükəsizliyi Xidmətinin ictimaiyyətlə əlaqələr mərkəzinin məlumatında deyilir ki, istintaqla Silahlı Qüvvələrin Baş Kliniki Hospitalının şöbə rəisi Vüsal Eyvazovun müəssisənin əməkdaşı Hüseyn Ağayev vasitəsi ilə hərbi qulluqçulardan müharibə zamanı qazanılmış əlilliyin dərəcəsinin təyin edilməsi və onlara birdəfəlik sosial sığorta vəsaiti verilməsi üçün rüşvət tələb etdiyi müəyyən edilib.
Əməliyyat-istintaq tədbirləri nəticəsində Eyvazov və Ağayev cinayət başında yaxalanıb.
Eyvazova 311.3.2 (dəfələrlə rüşvət alma), Ağayevə isə 33.5, 311.3.2-ci maddələrlə ittiham irəli sürülüb. Məhkəmənin qərarı ilə onlar barəsində həbs qətimkan tədbiri seçilib. İstintaq davam etdirilir.