Rüşvət almaqda şübhəli bilinərək saxlanılan Səfərbərlik və Hərbi Xidmətə Çağırış üzrə Dövlət Xidmətinin Səbail rayon idarəsinin sabiq rəisi, polkovnik Vüsal Babayev Hərbi Prokurorluqda aparılan cinayət işi üzrə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.
Səfərbərlik və Hərbi Xidmətə Çağırış üzrə Dövlət Xidmətinin məlumatına görə 2020-ci ilin yay aylarında Xidmətin Səbail rayon idarəsində yoxlamalar keçirilib. Xidmətdə buraxdığı nöqsanlara görə Səbail rayon idarəsinin rəisi polkovnik Vüsal Babayev vəzifəsindən kənarlaşdırılaraq sərəncama götürülüb və xidməti fəaliyyətinə qiymət verilməsi üçün materiallar Hərbi Prokurorluğa göndərilib.
Bir müddət sərəncamda qaldıqdan sonra V.Babayev ehtiyata buraxılıb.
Qeyd edək ki, V.Babayev Səbaildən öncə Səfərbərlik və Hərbi Xidmətə Çağırış üzrə Dövlət Xidmətinin Abşeron şöbəsinin rəisi olub. O, yeni vəzifəsinə 2018-ci ildə təyin edilmişdi.
O da maraqlıdır ki, V.Babayev bu postda məmur qohumunu əvəzləyib. Üç il öncə təqaüdə göndərilən və Vüsal Babayevin əvəzlədiyi polkovnik Namiq Hüseynov respublikanın keçmiş Hərbi Komissarı, sabiq millət vəkili Əliağa Hüseynovun qardaşı oğludur.
Onu da qeyd edək ki, V.Babayev Xüsusi Dövlət Mühafizəsi Xidmətinin sabiq rəisi, general-polkovnik Vaqif Axundovun bacısı oğludur.