Türkiyənin İstanbul şəhərində dənizdə meyiti tapılan NİDA-çı gənc Bayram Məmmədov dəfn edilib.
Bu barədə sosial şəbəkədə məlumat paylaşılıb.
Nəşi dünən Azərbaycana gətirilən Bayram Məmmədov Bakıda dəfn olunub.
Qeyd edək ki, Türkiyənin “Sabah” nəşri mayın 5-də 25 yaşlı ictimai fəalın ölümü ilə bağlı xəbər yayıb. Xəbərdə B.Məmmədovun mayın 2-də dənizdə boğulduğu bildirilib.
Məmmədoun yaxınları bildirib ki, Türkiyə polisi Bayram Məmmədovun ölümünü “şübhəli ölüm” kimi qeydə alıb və istintaq davam etdirilir.
B.Məmmədov Azərbaycanda siyasi məhbus kimi tanınıb. O və Qiyas İbrahimov 9 may 2016-cı ildə keçmiş prezident Heydər Əliyevin abidəsinə “Qul bayramınız mübarək!” şüarı yazdıqdan sonra həbs edilib.
Hər iki gənc fəal həmin il oktyabrın 25-də Bakı Ağır Cinayətlər Məhkəməsində narkotik ittihamı ilə 10 il müddətinə azadlıqdan məhrum edilib.
2019-cu il martın 16-da əfv sərəncamı ilə azadlığa buraxılıblar.