Bu gün səhər saatlarında Dövlət Təhlükəsizlik Xidməti (DTX) Şəmkir Rayon İcra Hakimiyyətində antikorrupsiya əməliyyatı keçirib.
Əməliyyat tədbirləri nəticəsində icra başçısı Alimpaşa Məmmədov, onun birinci müavini, hazırki təhsil şöbəsinin müdiri Qüdrət Əliyev, baş memar İlqar Quliyev, şəhər icra nümayəndəsi Pərviz İbrahimov və mənzil-kommunal istismar idarəsinin rəisi Teymur Hacıyev saxlanıblar.
Əməliyyatla bağlı bəzi idarə və müəssisə rəhbərləri sorğuya cəlb olunub. Axtarışlar həmçinin Alimpaşa Məmmədovun yaşadığı evdə də aparılıb. Daha sonra icra başçısı və digər şübhəli şəxslər paytaxta gətiriliblər.
Qeyri-rəsmi məlumatlarda A.Məmmədov və digər saxlanılanların vəzifədən sui-istifadə etməkdə, sahibkarlardan rüşvət almaqda və digər vəzifə cinayətlərində suçlandığı bildirilir.
Qeyd edək ki, Alimpaşa Məmmədov adı qalmaqallarda keçən icra başçılarından biri idi. Onun Şəmkirdə xüsusən sahibkarlara “qan uddurduğu”na dair iddialar vardı.
A.Məmmədov keçmiş vergilər naziri Fazil Məmmədovun adamı kimi tanınırdı. Onun icra başçısı postuna F.Məmmədovla yaxınlığı sayəsində gəlib çıxdığı söylənilirdi.
Onu da qeyd edək ki, A.Məmmədov 2014-cü ilədək vergi sistemində yüksək vəzifələrdə çalışıb. O, bir sıra rayonlarda vergi idarəsinin, daha sonra 2 saylı Ərazi Vergilər İdarəsinin (Sumqayıt şəhəri, Abşeron, Siyəzən, Xızı rayonlarını əhatə edir) rəisi vəzifəsində çalışıb. Ardınca isə Vergilər Nazirliyi yanında Bakı şəhər Vergilər Departamentinin rəisi vəzifəsinə təyin edilmişdi. Vergi sistemində çalışarkən onun adı “sahibkarlara divan tutanlar” sırasında hallanırdı.
A.Məmmədov daha sonra – 2014-cü ildə Şəmkir rayon İcra Hakimiyyətinin başçısı vəzifəsinə təyin edilmişdi.
