Böyük Britaniya və Şimali İrlandiyanın Kraliçası II Yelizavetanın həyat yoldaşı, Edinburq Hersoqu II Filip bu gün 100 yaşında dünyasını dəyişib.
Bu barədə Bukinqem Sarayının tvitter hesabında məlumat verilib: “Kraliça Əlahəzrət dərin kədərlə sevdiyi həyat yoldaşı, Edinburq Hersoqu Şahzadə Filipin ölümünü elan etdi”.
Birləşmiş Krallığın Hərbi Kollecinin məlumatında isə bildirilib ki, II Filipin dəfn mərasimi ictimaiyyətə açıq formada yox, koronavirus pandemiyası səbəbindən Vindzor qəsrində məhdud sayda insanların iştirakı ilə keçiriləcək.
Bildirilir ki, bu qərar şahzadə II Filipin ölümündən qabaq öz istəyi ilə qəbul edilib. İctimaiyyət nümayəndələri dəfn mərasiminə buraxılmayacaq.
Dəfnin tarixi barədə məlumat daha sonra veriləcək.
Britaniyada milli matəm 8 gün, kral ailəsində isə 30 gün davam edəcək. 30 gün sonra kraliça vəzifəsinin icrasına davam edəcək.
Qeyd edək ki, II Filip 2017-ci ildən bəri ictimai tədbirlərdə iştirak etməkdən imtina edib. Bu ilin fevral ayında isə İngiltərə mətbuatında onun ürək əməliyyatı keçirdiyi barədə məlumat dərc olunmuşdu.
