Martın 8-də bəzi ərazilərdə havanın kəskin soyuması, yağan qar yerli əhalinin işini çətinləşdirib. Həftəsonu və bayram günü ictimai nəqliyyatın işləməməsi üzündən insanlar şəxsi avtomobillərindən istifadə etməli olublar. Avtomobil yollarında hərəkət etmək təhlükəli hal yaradıb.
DİN-in Mətbuat Xidmətinin Gəncə regional qrupunun əməkdaşı Eşqin Qasımovun məlumatına görə Göygöl rayonunda sakinlərdən, xüsusi ilə dağ kəndlərində yaşayanlardan, mümkün qədər yaşayış yerlərini tərk etməmələri xahiş olunub. Sürücülərə şəxsi avtomobillərdən az istifadə etmələri tövsiyə edilib.
Gədəbəydə yollar buz bağlayıb. Rayonda hətta yük maşını yolda qalıb, yol bağlanıb. Yalnız avtomobil yolu təmizlənəndən sonra nəqliyyatın hərəkəti bərpa olunub.
Ekologiya və təbii şərvətlər nazirliyinin məlumatına görə martın 8-də rayonlarda hava şəraiti qeyri-sabit keçib. Gəncə şəhərinə, Daşkəsən, Gədəbəy, Göygöl, Ağdam, Ağstafa, Tovuz, Zaqatala, Şəki, Quba, Qax rayonlarına, Şahdağa qar yağıb.