Şuşa şəhəri Azərbaycanın mədəniyyət paytaxtı elan edilib. Bu barədə dövlət başçısı İlham Əliyev yanvarın 5-də ölkənin mədəniyyət naziri Anar Kərimovla söhbət zamanı bildirib.
“Mən Şuşa şəhərini Azərbaycanın mədəniyyət paytaxtı elan edirəm. Şuşa təkcə Azərbaycanın deyil, bütün regionun mədəniyyət paytaxtı olmağa layiqdir”, – İ.Əliyev deyib.
8 noyabr 2020-ci ildə şəhərin erməni işğalından azad edilməsindən sonra Şuşada bərpa işlərinə başlanılıb. İ.Əliyev qeyd edib ki, mənzil fondunun, tarixi abidələrin yoxlanılması aparılır. Dəymiş ziyanın hesablanmasından sonra şəhərin tarixi görünüşünün bərpasına başlanılacaq.
8 may 1992-ci il tarixində Ermənistan-Azərbaycan münaqişəsi zamanı şəhər ermənilər tərəfindən işğal edilərək yandırılıb. Şuşa 8 noyabr 2020-ci ildə İkinci Qarabağ Müharibəsi zamanı işğaldan azad edilib.