2020-ci ildə dünya milyarderlərinin gəliri 1,9 trilyon dollar artıb.
Bu barədə “Forbes” məlumat yayıb.
11 dekabr göstəricilərinə görə, dünya zənginlərinin sərvəti 11,4 trilyon dollar olub ki, bu da ötən ilin sonundakı göstəricidən 20% çoxdur.
“2020-ci il izolyasiya, pandemiya, siyasi qarşıdurma və ən əsası planetin ən varlı insanlarının sərvətinin inanılmaz artım ili oldu. Əsas fond bazarlarında 2200-dən çox milyarderin sərvəti 1,9 trilyon dollar çoxalıb”, – deyə jurnalın məlumatında deyilir.
Jurnalın hesablamalarına görə, 400 çinli milyarderin sərvəti bir ildə 60% və yaxud 750 milyard dollar artıb və hazırda 2 trilyon dollar təşkil edir. Şanxay və Şençjen birjalarındakı səhmləri izləyən CSI 300 indeksi bu il 19% artıb.
600 amerikalı milyarderin sərvəti 500 milyard dollar artaraq 4 trilyon dollar təşkil edib. Xüsusilə SpaceX və Tesla şirkətlərinin rəhbəri Elon Maskın sərvəti 110 milyard dollar artaraq 137 milyard dollara çatıb. Sahibkar “Forbes”in reytinqində 3-cü yerdədir.
Fransız milyarderlər isə sərvət artımına görə üçüncü sırada qərarlaşıb. 40 fransız milyarderin sərvəti 95 milyard dollar artaraq 500 milyard dollara çatıb. Bu artımın yarıdan çoxu “Louis Vuitton Moët Hennessy”in rəhbəri Bernar Arnonun və L’Oreal şirkətinin ortağı Fransuaza Bettankur-Meyersin payına düşür.