Türkiyə de-yure və ya de-fakto Ermənistan-Azərbaycan münaqişəsinin nizamlanmasında iştirak edəcək. Bu barədə Azərbaycan prezidenti İlham Əliyev Türkiyənin Haber Türk telekanalına müsahibəsində bildirib.
“Ankaranın fikrinə qulaq asırlar və onu nəzərə alırlar. Bu gün Rusiya və Türkiyə XİN başçıları və müdafiə nazirləri Cənubi Qafqazdakı vəziyyəti müzakirə edirlər. Ankaranın iştirakı olmadan Dağlıq Qarabağ münaqişəsi nizamlana bilməz”, deyə Azərbaycan lideri qeyd edib.
Onun sözlərinə görə, ATƏT-in Minsk Qrupu 90-cı illərin əvvələrində yaradılıb və onun bəzi iştirakçılarının Cənubi Qafqazla heç bir əlaqəsi və bu bölgədə heç bir marağı yoxdur.
Döyüş əməliyyatlarının gedişatına toxunan Əliyev deyib ki, son döyüşlər zamanı Ermənistanın 200-ə yaxın zirehli texnikası məhv edilib, 33 tank ələ keçirilib. İki S-300 ZRK və bir çox hərbi texnika məhv edilib.
“Azərbaycan ordusunun sentyabrın 27-dən etibarən məhv etdiyi silah-sursatın dəyəri 2 milyard dollara çatır. Bütün bunlar Yerevana hədiyyə edilmişdi”, deyə Əliyev bildirib.