Dövlət Təhlükəsizlik Xidməti (DTX) mayın 7-də İmişli rayonunun keçmiş icra başçısı Vilyam Hacıyevin həbsinin səbəbləri barədə rəsmi məlumat yayıb.
Hacıyevin saxlanılması üzrə xüsusi əməliyyat mayın 5-də İmişli rayonuna ayrılmış dövlət vəsaitinin mənimsənilməsi, rüşvət alınması, vəzifə səlahiyyətlərindən sui-istifadə haqqında məlumatlar əsasında həyata keçirilib.
Hacıyevin xidmət kabinetində və mənzilində axtarışlar zamanı onun İcra Hakimiyyətinin baş mühasibi Cəmil Musayev və digər şəxslər vasitəsilə rüşvət aldığı haqqında dəlillər aşkar edilib.
Yayılan videokadrlardan göründüyü qədər, rayon icra başçısının mənzilində 3 mln. dollar və yarım milyon avro götürülüb.
İstintaqda həmçinin Hacıyevin ictimai işlərə cəlb edilmiş şəxslərin əmək haqlarını mənimsəməsi, dövlət mənzillərini vətəndaşlara satması haqqında məlumatlar var.
Bununla yanaşı, istintaqda Hacıyevin tabeliyində olan şəxslərdən, başqa dövlət orqanlarından və sahibkarlardan pul tələb etməsi haqqında məlumat olub.
Hacıyev cinayət işi üzrə təqsirləndirilən şəxs qismində cəlb edilib və həbs edilib.
* * *
Vilyam Hacıyev barəsində həbs qətimkan tədbiri seçilib
Mayın 6-da İmişli Rayon İcra Hakimiyyətin sabiq başçısı Vilyam Hacıyev barəsində 4 aylıq həbs qətimkan tədbiri seçilib.
Bu barədə qərar Səbail Rayon Məhkəməsində Dövlət Təhlükəsizlik Xidmətin təqdimatına baxılaraq qəbul edilib.
Hacıyevə qarşı Cinayət Məcəlləsinin 308-ci (vəzifə səlahiyyətlərini aşma), 179-cu (mənimsəmə) və 311-ci (rüşvət alma) maddələri üzrə ittiham irəli sürülüb.
* * *
İmişli icra başçısının həbsi dolayısı ilə təsdiqlənib
Mayın 6-da ölkə prezidenti Vilyam Hacıyevin İmişli Rayon İcra Hakimiyyətinin başçısı vəzifəsindən azad edilməsi barədə sərəncam imzalayıb.
Səbəb göstərilmir, lakin bir gün öncə Dövlət Təhlükəsizliyi Xidməti rayonda əməliyyat keçirərək bir neçə məmuru həbs edib. Qeyri-rəsmi məlumatlara görə, rayon icra başçısı da korrupsiyaya görə həbs olunub.
Contact.az