Tramplin. Tramplinin nə olduğunu bilənlər bilir, bilməyənlərə belə izah edək. Daha yüksəyə və ya uzağa tullanmaq üçün sürəti artırmağa kömək edən təkanverici vasitə. Təhsil institutu pis tramplin deyil. Yəni vəzifə pillələrini sürətli atlamaq üçün sərfəli vasitədir.
İndiki təhsil naziri Emin Əmrullayev nazirlikdə şöbə müdiri, liseydə direktor olub iki vəzifə daşıdığı dövrlərdə, 2020-ci ilin yanvarında Təhsil institutuna direktor təyin edildi. Cəmi altı aydan sonra trampilinə təkan vurub 27 iyulda nazir kreslosuna tullandı. Eks nazirlər M.Cabbarov və C.Bayramovun dəstəyilə. 7 yanvar 2021-ci ildə onu Rüfət Əzizov əvəzlədi. 2023-cü ilin yayınadək. R.Əzizov da bir təkanla Sumqayıt universitetində, sonra ADNSU-da rektor oldu. Tramplin dayanıqlı çıxdı.
27 iyul (E.Əmrullayevin uğur rəqəmi) 2023-cü ildə Təhsil instiutu Elnur Əliyevə tapşırıldı. Nazirlikdə şöbə müdiri və nazirin müşaviri olan E. Əliyev müşavirlikdə qalaraq ARTİ-yə direktor səlahiyyətlərini icra etməyə gəldi. Üç il üç aya yaxındır, direktor səlahiyylərini icra edir (səlahiyyət müddəti rəsmi qaydada artırılmadan), amma heç cür direktor ola bilmir! Niyə?Tramplin zədələnibmi?
Niyə Rüfət Əzizov birbaşa direktor təyin edildi, iki ildə iki universitetdə rektor oldu, Elnur Əliyev üç il üç aya direktor ola bilmir? Layiq görülmür, ya idarəçiliyi zəifdir? Sual yaranır: adam uyğun kadrdırsa niyə icraçı olaraq qalmaqla aşağılanır? Uyğun deyilsə niyə uzaqlaşdırılmır? Ya ona tapşırılan qaranlıq işlər bitməyib hələ? İcraçı olmaq səlahiyyətli şəxsi məsuliyyətdən qoruyur?
Təhsil institundan gələn məlumatlara görə E.Əliyevin təsdiq edilməməsinin bir neçə səbəbi var. Biri, xarakter, nüfuz, bacarıq məsələsidir. R.Əzizov direktor olarkən institutda idarəçilik aydın görünürdü. Yaxşı, ya pis. Bütün ciddi məsələlərin həllində direktor şəxsən iştirak edirdi və hamıya açıq şəxs idi. Özünə güvənən R.Əzizov işçilərdən qaçıb gizlənmir, direktor müavinlərinin arxasına sığınmırdı. E.Əliyevinsə qəbul otağının qapısı həmişə qapalıdır. Özü də qapalı. Müavinlər onun adından qərarlar verirlər, sənədləri elektron imzayla kim təsdiqləyir bəlli deyil. Gizlənmək hər zaman qorxaqlıq kimi anlaşılmasa da, dəqiq bacarıqsızlıq kimi qəbul olunur. Harda nəyi necə etmək lazım olduğunu bilməyən kəs məcburdur üzə çıxmasın, gizlənsin, məsləhətləşsin, idarə olunsun və son söz haqqını itirsinn. Bəli, bu, idarəçilikdən xəbərsiz olmaqla yerində olmamaq deməkdir. Bəlkə də elə qorxaqlıqdır. “Babalı Sərvərin boynuna”.
Deyilənə görə E.Əliyevin səlahiyyət icraçısı kimi yerinə saymasının bir səbəbi də onun sağlamlıq problemləri ilə bağlıdır. E.Əmrullayev müşavirinə ona görə direktorluğu tapşırıb ki, güvənir, eyni zamanda bu vəzifəyə uyğun olmadığını də anlayır. Təhsil institutu milyonluq layihələrin üyüdüldüyü dəyirmandır, Əliyev icraçı. Hər maliyyə “fırtınasından” səlahiyyət icraçısı faizini götürür və onu xaricdə sağlamlıq problemlərinin həllinə xərcləyir. Problem aradan qalxandan sonra E.Əliyevin direktor təsdiq edilib edilməyəcəyi, harasa göndəriləcəyi dəqiqləşəcək. Yaz gələcək, gözləməkdən başqa yol yox!
Elnur Əliyevin uzunmüddətli içraçı direktor olmasının digər səbəbi deyilənə görə, Emin Əmrullayevin vəzifədən çıxarılacağı ilə bağlı dolaşan söhbətlərlə əlaqəlidir. Təhsil sektorundan narazılıqlar kütləviləşdikcə, yuxarılara gedən şikayət qutuları aşıb daşdıqca, faktlar çoxalıb ciddiləşdikcə nazirin kreslosu laxlayır. Bir laxlayar, kağız bağlamasıyla bərkidərsən, iki laxlayar bərkidərsən, üçüncüdə tarmar olar. Bax onda, Əmrullayevin yandaşı E.Əliyevin səlahiyyətini əlindən almaq asanlaşar. Bir sözlə, ARTİ direktorluğu E.Əmrullayevin ehtiyat variantıdır. “Vurulsa” , özəl təsərrüfata çevirdiyi Təhsil institutuna direktor kimi qayıdacaq. O məmləkətdə ki, on minlərlə müəllim işdən çıxarılır, MİQ, sertifikasiya, olimpiadalar şəffaflıqla deyil, “milli” standartlarla aparılır, 20 illik təcrübəsi olan müəllim belə istefa mədəniyyəti formalaşdırmaq yolunda ilk addım atır, şər deməsən xeyir gəlməz. Gəlməsin də.