Sabunçu rayonu Maştağa qəsəbəsinin sakini, 76 yaşlı Bağır Həsənovun evində yanğın baş verib. Bağır Həsənovun, oğullarıToğrul və Aydın Həsənovların ailələri ilə birgə yaşadığı ev əşya və avadanlıqları ilə birgə yanıb. Üç ailə hazırda evsiz qalıb.
Ailənin yaxını Dilarə Quliyevanın saytımıza verdiyi məlumata görə, yanğının səbəbi bəlli deyil. Evsiz qalan ailələr müvəqqəti qohumların evinə sığınmağa məcbur olublar. Yanğından ciddi zərər görmüş evin bərpası üçün böyük vəsait tələb olunur, lakin ailələrin buna maddi imkanı yoxdur. Aidiyyatı dövlət qurumlarının, xeyirxah insanların köməyinə ehtiyac var.
D.Quliyevanın bildirdiyinə görə, yeni dərs ili üçün 128 nömrəli məktəbdə təhsil alan beş nəfər əlaçı və fəal şagirdə alınan yeni geyim və əşyalar, məktəb ləvazimatları da tamamlilə yanıb, külə dönüb. Torul Həsənov anadangəlmə əlildir, övladları yuxarı sinif şagirdləridir. Baş verən hadisə hamıdan çox uşaqları məyus edib, çıxılmaz duruma salıb.
32 il UBTR (Uşaq Birliyi Təşkilatı Rəhbərləri) Məktəbinin direktoru olmuş Dilarə Quliyeva Elm və təhsil nazirliyinə, Bakı təhsil idarəsinə müraciət edərək yanğından sarsılan ailələrdə böyüyən uşaqlara maddi və mənəvi dəstək göstəriləcəyinə ümid etdiyini bildirir. Onun fikrincə, bu qurumlar məktəbliləri pulsuz geyim və ləvazimatla təmin edə bilərlər.
Dilarə Quliyeva