Gürcüstanda noyabrın 28-dən bəri Avropa İttifaqında üzvlük danışıqlarının dayandırılmasına etiraz olaraq keçirilən etiraz aksiyalarında 400-ə yaxın adam saxlanılıb. Bu barədə həbs olunanlara hüquqi yardım göstərən Transparency International təşkilatının Gürcüstan bölməsi məlumat verib.
Hüquq müdafiə təşkilatı qeyd edib ki, 350-dən çox şəxs inzibati, 26 nəfər isə cinayət işi üzrə cəlb olunub. Hüquq müdafiəçilərinin bildirdiyinə görə, 300-dən çox saxlanılan işgəncəyə və qeyri-insani rəftara məruz qalıb. 80 etirazçı saxlanıldıqdan sonra xəstəxanaya yerləşdirilib.
İnzibati işlərdə məhkəmələr 2000-3000 lari (təxminən 700-1000 dollar) məbləğində cərimə və ya 4 gündən 14 günə qədər həbs tətbiq edir.
Dekabrın 6-da Tbilisi şəhər məhkəməsi kütləvi iğtişaşlar və zorakılığın təşkili ilə bağlı cinayət işi üzrə 8 nəfəri istintaq təcridxanasına göndərib. Onları 7 ildən 9 ilə qədər həbs gözləyir.
Transparency International qeyd edir ki, məhkəmələr etirazçıların döyülməsi və işgəncəyə məruz qalması hallarını araşdırmır və qərar verərkən yalnız polis əməkdaşlarının ifadəsinə əsaslanır.
Gürcüstan Daxili İşlər Nazirliyinin məlumatına görə, 48 nəfər saxlanılıb. Müxalif “Qirçi – Daha Çox Azadlıq” partiyasının liderlərindən biri Tsotne Koberidze həbs zamanı döyüldüyünü deyib.
“Gürcülərin öz azadlıqları və Avropa gələcəyi uğrunda mübarizəsinin doqquzuncu günü amansız terror və fundamental insan hüquqlarının kobud şəkildə pozulması – adam oğurluğu, döyülmə, qanunsuz axtarışlar və həbslər ilə qarşılanır”, Gürcüstan prezidenti Salome Zurabişvili deyib.
Noyabrın 28-dən Gürcüstanda etiraz aksiyaları keçirilir. Etirazlar baş nazir İrakli Kobaxidzenin 2028-ci ilə qədər Aİ-yə üzvlük danışıqlarını dayandırdığını elan etdikdən sonra başlayıb. (Amerikanın səsi)