Braziliyalı futbol əfsanəsi Pele keçən il xərçəng və ürək problemi ilə mübarizə apardıqdan sonra 82 yaşında vəfat edib. Əfsanəvi karyerası ərzində milli komandasına misli görünməmiş üç Dünya Kuboku titulunu qazandıran Pele idmanın bu növünün ən böyük oyunçulardan biri kimi tanınıb.
Sadəcə Pele kimi tanınan bu insan Santos futbol klubunda ilən beynəlxalq turnirlər və klub oyunları və Braziliyanın milli komandasının daxilində Dünya Kuboku zamanı azarkeşlərini heyrətə gətirib. O, karyerasının sonunda isə ABŞ-da New York Cosmos klubuna qoşulub.
Edson Arantes do Nasimento 1940-cı il oktyabrın 23-də anadan olub. O, futbol bacarıqlarında şöhrəti uşaq ikən qazanıb və 15 yaşında “Santos” klubu ilə müqavilə imzalayıb.
Pele 16 yaşında artıq Braziliya milli komandasının üzvü idi. 1958-ci ildə, 17 yaşında Dünya Kuboku üzrə çempionata qatılıb. O, İsveçdə keçirilən turnirdə 6 qol vuraraq, Dünya Kubokunda ən çox qol vuran ən gənc oyunçu olub.
Pelenin 1958-ci ilin final matçında vurduğu iki qol Braziliyanı çempion edib. O, 1962 və 1970-ci illərdə komandasına daha iki Dünya Kuboku titulunu qazandırıb.
Beynəlxalq karyerasında 92 rəsmi matçda 77 qol vuran Pele argentinalı Diyeqo Maradona ilə birlikdə FİFA-nın 20-ci əsrin ən yaxşı oyunçusu seçilib.
1975-ci ildə Pele Şimali Amerika Futbol Liqasının “New York Cosmos” komandasına qoşulub və orada üç mövsüm oynayıb. 2015-ci ildə Pele müvəffəqiyyətli bir idmançı olaraq həyatını necə keçirdiyini təsvir edib. “Məncə, uğurun sirri insanlara hörmət etmək, hər zaman hazır olmaq və heç vaxt özünü ən yaxşısı hesab etməməkdir” deyib Pele.
Fransa millisinin ulduzu Kilian Mbappe Pele irsinin “heç vaxt unudulmayacağını” deyib.
Pelenin qızı Keli Nasimento isə Instagram səhifəsində atasının xatırəsini anaraq, portuqal dilində “Bizim nəyimiz varsa sənin sayəsindədir. Səni sonsuzadək sevirik, rahat yat” yazıb.