Bakının Binəqədi Rayon Məhkəməsi Azərbaycan Baş Prokurorluğunun İstintaq İdarəsinin təqdimatını təmin edərək, vəkil Elçin Sadıqov və jurnalist Əvəz Zeynallı barəsində 4 ay müddətinə həbs qətimkan tədbiri seçib.
Elçin Sadıqov Cinayət Məcəlləsinin 32.5, 311-ci (rüşvət almaya köməkçilik etmək), Əvəz Zeynallı isə 311.3.3-cü (külli miqdarda rüşvət alma) maddələri ilə ittiham olunur.
Əvəz Zeynallının vəkili Aqil Layıcın, Elçin Sadıqovun vəkilləri Şəhla Hümbətova və Bəxtiyar Hacıyevin sözlərinə görə, prokurorluq cinayət təqibini KİV-də yayılan məlumatlar əsasında başlayıb və işdə konkret şikayətçi yoxdur.
Sadıqov və Zeynallı ittihamları rədd edir və cinayət təqibini peşə fəaliyyətləri ilə əlaqələndirirlər.
Hər ikisi cinayət işini uydurma hesab edərək istintaqa ifadə verməkdən imtina ediblər. Məhkəmə qərarlarından apelyasiya şikayətləri veriləcək.
