Rusiyanın nəzarətində olan Ukraynanın Xerson və Zaporojye bölgələrində insanlar oğurlanır və işgəncələrə məruz qalır, İnsan haqları üzrə beynəlxalq təşkilat bilidrir.
Human Rights Watch (HRW) qrupunun son hesabatında rusiyalı hərbçilərin yerli sakinlərə qarşı “qanunsuz hərəkətləri” sənədləşdirilib.
HRW əməkdaşları Xerson, Melitopol, Berdyansk, Skadovsk və Ukraynanın digər 10 şəhər və qəsəbəsindən olan 71 nəfərlə danışıblar.
Sənəddə 42 hadisənin təsviri əks olunur. Onlardan birinə əsasən, martın 27-də Rusiya hərbçiləri Xersonun ərazi müdafiə komandiri Vitali Lapçuku, onun müavini Denis Mironovu və “Oleq” adlı (müdafiə məqsədilə onun əsl adı açıqlanmayıb) könüllünü oğurlayıblar.
Mironov əsirlikdə yetirilən “xəsarətlərdən ölüb”. Onun həyat yoldaşının dediyinə görə, əlləri bağlı və ayaqlarında ağırlıq olan Lapçukun cəsədi mayın 22-də çayda tapılıb.
İşgəncələr verilən “Oleq” sağ qalıb. O, əsirlərin mübadiləsi vaxtı qaytarılıb.
Hüquq müdafiəçilərinin hesabatında jurnalistlərin, fəalların, etirazçıların və yerli məmurların saxlanması hekayələri də təsvir edilir.
Onların bəzilərinin harada olduğu hələ də yaxınlarına məlum deyil.
HRW xatırladır ki, qanunsuz həbslər və adam oğurluğu beynəlxalq humanitar hüquqa ziddir və müharibə cinayətidir, silahlı münaqişə vəziyyətində isə insanlığa qarşı cinayət də sayıla bilər.
Rusiya sənədə münasibət bildirməyib. Moskva bir çox hallarda insan haqları ilə bağlı Qərbdə səslənən tənqidlərin qərəzli olduğunu deyir. (bbc.com)