Azərbaycan Baş Prokurorluğu aprelin 19-da 2017-ci ilin may-iyun ayları ərzində Tərtər, Ağdam, Beyləqan rayonlarında bir qrup hərbi qulluqçunun həbsi və işgəncələrə məruz qoyulması faktlarının təkrar araşdırmasının gedişatı haqqında məlumat yayıb. Bu hərəkətlər bir qrup hərbiçinin ölümünə və digər ağır nəticələrə gətirib çıxarıb.
İndiyədək cinayət işləri üzrə ümumilikdə 397 nəfər zərərçəkmiş şəxs müəyyən edilib. Ötən dövr ərzində işgəncələrə və digər qanunsuz əməllərə məruz qalmış 280 nəfər yeni şəxs müəyyən edilib.
Hərbi qulluqçular Rəşid Niftəliyev, Ruslan Mikayılov, Sənan Maşıyev, Cabir Qəhrəmanov, Polad Əzizov, Elçin Əliyev və İntiqam Məmmədov qanunsuz əməllərdə, o cümlədən işgəncə və səlahiyyətlərin aşılmasında təqsirli bilinib.
Onlar Cinayət Məcəlləsinin 145.3 (qanunsuz azadlıqdan məhrum etmə), 293.2 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma), 341.2.3 və 128-ci (qəsdən sağlamlığa yüngül zərər vurma) maddələri ilə təqsirləndirilən şəxs qismində cəlb edilərək barələrində həbs qətimkan tədbiri seçilib, həmçinin Polad Əzizov istintaqdan gizləndiyi üçün barəsində axtarış elan edilib.
Eyni zamanda hazırda cəza çəkən Fuad Ağayevə qarşı Cinayət Məcəlləsinin 145.3, 293.2, 341.2.2, 341.2.3 və 128-ci maddələri ilə ittiham elan edilib.
* 2017-ci il mayın 7-də Azərbaycan Baş Prokurorluğu, Dövlət Təhlükəsizliyi Xidməti və DİN Ermənistan xüsusi xidmətlərinin xeyrinə casusluğa görə bir qrup hərbi qulluqçu və mülki şəxsin saxlanıldığı barədə məlumat yayıb.
Yüzlərlə hərbiçi və mülki şəxs istintaqa cəlb edilib. Prokurorluq CM-in 274-cü (dövlətə xəyanət) maddəsi ilə cinayət işi açıb. Saxlanılan şəxslər müxtəlif müddətli azadlıqdan məhrumetmə cəzalarına məhkum edilib. Amma tezliklə məlum olub ki, istintaqda ən az 11 hərbiçi işgəncələr nəticəsində vəfat edib. Sonrada öldürülən hərbiçilərdən dördünə bəraət verilib, onlara qarşı ittihamları saxtalaşdıran müstəntiqlər isə müxtəlif müddətli həbs cəzalarına məhkum edilib.
18 dekabr 2021-ci il tarixində Baş Prokurorluq “Tərtər işi” üzrə cinayət icraatının bərpa edildiyini bəyan edib.