Vaşinqtondakı strateji və beynəlxalq araşdırmalar Mərkəzinin (CSIS) analitikləri Rusiyanın Ukraynaya hücumunun üç istiqamətini müəyyən ediblər.
İstiqamətlərin hər üçü dəmir yollarına paralel keçir və bütün zəruri imkanlara malikdir.
Analitiklər Rusiya-Ukrayna sərhədlərindəki hazırkı vəziyyəti, qoşunların cəmləşmə rayonlarını təhlil edərək belə qənaətə gəliblər ki, Rusiya ordusu şimal, mərkəz və cənub istiqamətindən Ukrayna ərazisinə girəcək.
Azov dənizindən dəniz desantının çıxarılması və hava desantının dəstəyi ilə Odessa ələ keçiriləcək, nəticədə Ukraynanın dənizlə əlaqəsi kəsiləcək.
Analitiklərin fikrincə, əgər Rusiya Ukraynaya müdaxiləyə qərar versə şimal istiqamətindən qoşunlar Belarus üzərindən hərəkət edərək Kiyev ətrafındakı müdafiə xəttini kənardan keçəcək. Mərkəz istiqamətindən zərbə daha sonra qərbə istiqamətlənəcək və qoşunlar ölkənin dərinliklərinə doğru irəliləyəcək. Cənub istiqamətindən isə Perekop keçidi üzərindən olacaq.
Analitiklər onu da qeyd ediblər ki, əgər ABŞ və onun Avropadakı müttəfiqləri Rusiyanın müdaxiləsinin qarşısını ala bilməsə, Ukrayna daxilində işğalçı qoşunlara qarşı müqavimət hərəkatının formalaşdırılmasına diplomatik, hərbi və kəşfiyyat dəstəyi verməlidir. Ona görə də bildirilib ki, ABŞ və tərəfdaşları Rusiyanın Ukraynanı işğal etməsinə yol verə bilməz:
“Rusiyanın Ukrayna ərazisini tam və ya qismən işğal etməsi onun sənaye imkanlarını, işçi qüvvəsi potensialını və təbii resurslarını o dərəcədə artıra bilər ki, Moskva qlobal təhdidə çevrilər. ABŞ və Avropa yenidən bu səhvə yol verə bilməz”.
Qeyd edək ki, Rusiya durmadan Ukrayna sərhədlərinə tanklar və digər zirehli texnika, qırıcı-bombardmançılar, artilleriya və reaktiv yaylım atəşi sistemləri, “İsgəndər-M” operativ-taktiki raketləri cəmləşdirir.
Britaniyanın “Daily Mail” nəşri peyk fotolarına istinadən Ukrayna həmsərhəd ərazilərdə səhra hospitallarının da qurulduğunu bildirir. Bu isə müharibəyə qərar verildiyinin sübutudur.
Bundan başqa, Rusiya rəsmilərinin son günlərdə istifadə etdikləri ritorika bu ölkənin Ukraynanı işğal planına qərar verdiyini sübut edir. Məsələn, prezident Vladimir Putinin mətbuat katibi Dmitri Peskov son günlərə qədər Ukraynaya hücum planlarını inkar edirdisə indi “Bloomberg”ə müsahibəsində bu ölkə ərazisində hücum silahlarının yerləşdirilməsinin mümkünlüyü haqda danışarkən deyib ki, “Biz inkar etməyə hazırlaşmırıq ki, Ukrayna ərazisində hücum silahları yerləşdirmək planlarımız var”.
Ukrayna ərazisində hücum silahlarını isə Rusiya ancaq bu ölkəni işğal edəndən sonra yerləşdirə bilər.