Bakı Apellyasiya Məhkəməsində 1 milyon manata yaxın dələduzluqda təqsirləndirilərək azadlıqdan məhrum edilən İlham Xıdırov və Nazim Mustafayevin vəkillərinin Bakı Ağır Cinayətlər Məhkəməsinin hökmündən verdikləri apellyasiya şikayətinə baxılıb.
Məhkəmə iclasında çıxış edən vəkil Cavad Cavadov müdafiə etdiyi şəxsin dələduzluq faktının sübuta yetirilmədiyini, buna görə də Bakı Ağır Cinayətlər Məhkəməsinin hökmünün ləğv edilməli və təqsirləndirilən şəxslərə bəraət verilməli olduğunu deyib. Vəkil İ.Xıdırova məxsus Abşeron rayonu, Saray qəsəbəsi, Yeni Məhəllə, 146 saylı fərdi yaşayış evinin üzərinə qoyulmuş həbsin götürülməsini istəyib.
Məhkəmə apellyasiya şikayətini təmin edib.
Belə ki, məhkəmənin qərarı ilə Bakı Ağır Cinayətlər Məhkəməsin hökmü ləğv edilib, İlham Xıdırov və Nazim Mustafayev barəsində bəraət hökmü çıxarılıb. Hər iki təqsirləndirilən şəxs məhkəmə zalından azadlığa buraxılıblar. Qərara əsasən İ.Xıdırova məxsus Abşeron rayonu, Saray qəsəbəsi, Yeni Məhəllə, 146 saylı fərdi yaşayış evinin üzərinə qoyulmuş həbs götürülüb.
Qeyd edək ki, İ.Xıdırov və N.Mustafayev İrandan və Rusiyadan kompressor avadanlıqları gətirib satmaq adı ilə bir neçə şəxsdən külli miqdarda pul almaqla onlara qarşı dələduzluqda etməkdə, beləliklə, ümumilikdə 1 milyon manata yaxın pulu mənimsəməkdə ittiham edilirdilər.
Bakı Ağır Cinayətlər Məhkəməsin hökmü ilə İ.Xıdırov 9 il 6 ay, N.Mustafayev isə 5 il azadlıqdan məhrum edilmişdi.