Külli miqdarda mənimsədə ittiham edilərək həbs olunan, xəstəliyi ilə bağlı ev dustaqlığına buraxıldıqdan bir neçə gün sonra vəfat edən “Azərxalça” ASC-nin keçmiş sədri Vidadi Muradovun cinayət işi üzrə məhkəmə prosesi davam etdirilib.
Bakı Ağır Cinayətlər Məhkəməsində hakim Əfqan Hacıyevin sədrliyi ilə keçirilən prosesdə məhkəmə istintaqı yekunlaşıb.
Dövlət ittihamçısı çıxış edərək V.Muradova verilmiş ittihamların tam sübuta yetirildiyini, lakin vəfat etməsi səbəbindən ona cəza təyin edilməməli olduğunu bildirib. O, Dövlət Vergi Xidmətindən verilmiş 641 min manat məbləğində mülki iddianın təmin edilməsini, V.Muradovun Yasamal rayonunda yerləşən mənzilinin üzərinə qoyulmuş həbsin götürülməsini, üzərinə həbs qoyulmuş və müsadirə edilmiş digər əmlakların isə dəymiş ziyanın ödənilməsinə yönəldilməsini istəyib.
Daha sonra zərər çəkmiş Dövlət Vergi Xidmətinin nümayəndəsi çıxış edərək V.Muradovun dövlət büdcəsinə vurduğu 641 min manatlıq ziyanın ödənilməsi ilə yanaşı, Binəqədi Rayon Məhkəməsinin qərarları ilə 19 milyon 144 min 554 manat məbləğindəki əmlaklarının və 11 milyon 442 min 490 manat məbləğində olan səhm paylarının satışından əldə olunmuş gəlirlərin də vergi orqanına ödənilməsini istəyib.
V.Muradovun vəkili müdafiə çıxışı üçün məhkəmədən vaxt istəyib.
Məhkəmənin növbəti iclası yanvarın 18-də davam etdiriləcək.
Qeyd edək ki, 9 yanvar 2021-ci ildə həbs edilən Vidadi Muradov Cinayət Məcəlləsinin 179.4 (mənimsəmə xüsusilə külli miqdarda ziyan vurmaqla törədildikdə), 308.2 (vəzifə səlahiyyətlərindən sui-istifadə ağır nəticələrə səbəb olduqda) və 313-cü (vəzifə saxtakarlığı) maddələri ilə ittiham edilirdi. Onun dövlətə vurduğu ziyanın məbləği 3.5 milyon manat həcmində dəyərləndirilir.
V.Muradov 2021-ci il noyabrın 5-də vəfat edib. Hazırda məhkəmədə hüquqi varis kimi onun həyat yoldaşı çıxış edir.
Xatırladaq ki, V.Muradovun oğlu Cavid Muradov Sabunçu Rayon Polis İdarəsinin rəisidir.