Kollektiv Təhlükəsizlik Müqaviləsi Təşkilatının (KTMT) sülhməramlı qüvvələri Qazaxıstana göndərilib.
Bu barədə məlumatı təşkilat yayıb.
KTMT Katibliyinin məlumatına görə, sülhməramlı kontingentin bölmələri artıq Qazaxıstanda tapşırıqlarını yerinə yetirməyə başlayıblar.
Hazırda sülhməramlı kontingentin Rusiya tərəfindən olan hissəsinin təyyarələr vasitəsilə Qazaxıstan ərazisinə gətirilməsi həyata keçirilir.
Sülhməramlı qüvvələrin tərkibinə Rusiya, Belarus, Qırğızıstan, Tacikistan və Ermənistan silahlı qüvvələrinin bölmələri daxildir. Məlum olanı budur ki, Qazaxıstana yeridilən kontingentin əsas hissəsini Rusiya qüvvələri təşkil edir.
Ermənistan KTMT sülhmrəmanlı qüvvələri tərkibində Qazaxıstana 70 hərbçi göndərib. “Sputnik-Armeniya” xəbər verir ki, söhbət “Qazaxıstanda kütləvi etirazlar fonunda kontingentin tərkibində strateji əhəmiyyətli obyektlərin mühafizəsini təmin etməli olan 70-ə yaxın hərbçidən gedir”.
Təşkilata üzv olan Qırğızıstan KTMT qüvvələrinin tərkibində hərbçilərini Qazaxıstana göndərmək barədə qərar verməyib, bu məsələdə parlamentin mövqeyi əsasında hərəkət edəcəyini bildirir. Qırğızıstan prezidenti Sadır Japarovun mətbuat katibi Erbol Sultanbayev bildirib ki, parlamentin dəstəkləyəcəyi halda qırğız hərbçiləri KTMT kollektiv qüvvələrinin tərkibində “müstəsna olaraq sülhməramlı fəaliyyət” üçün Qazaxıstana göndəriləcək. Lakin onların vəzifəsi ancaq strateji obyektlərin mühafizəsindən ibarət olacaq və Qırğızıstan hərbçiləri heç bir halda etirazçılara qarşı dayanmayacaq.
Lakin KTMT katibliyindən yayılan məlumata əsasən, Qazaxıstana göndərilən kontingentin tərkibində Qırğızıstan hərbçiləri də yer alır.
Rusiya Dövlət Dumasının müdafiə məsələləri komitəsinin sədr müavini Yuri Şvıtkin bildirib ki, KTMT-nin sülhməramlı əməliyyatı bir aya yaxın davam edə bilər. O, vəziyyətin tam normallaşması üçün azı bir ay vaxt lazım olduğunu deyib.
Eyni zamanda, Rusiya Dövlət Dumasının Müdafiə Komitəsinin sədr müavini Yuri Şvıtkin bildirib ki, Qazaxıstanda silahlı etirazçılar ölkədə vəziyyətin asan olmamasına baxmayaraq, KTMT hərbçilərinə müqavimət göstərə bilməyəcəklər:
“Onsuz da vəziyyət asan deyil. Ən böyük çətinlik etirazçıların əllərində silahların olmasıdır. Bu, kifayət qədər təhlükəlidir. Hərbçilər koloniyası peyda olan kimi etirazçılar geri çəkiləcəklərinə əminəm. Şübhə yoxdur ki, KTMT-nin sülhməramlı kontingenti və xüsusilə bizim hərbçilər qarşıya qoyulan vəzifələri uğurla yerinə yetirəcəklər. Bizim təcrübəmiz var, bu, Bakıdır, mən orada olmuşam, Oşda da, Fərqanədə də”.
Federasiya Şurasının sədr müavini Konstantin Kosaçev isə KTMT-nin Qazaxıstandakı əməliyyatının həm bloka üzv ölkələrin daxili qanunvericiliyinə, həm də beynəlxalq hüquqa uyğun olduğunu bildirib.
KTMT-nin Qazaxıstandakı Kollektiv Qüvvələrinin əsas vəzifələri “dövlət və hərbi obyektlərin mühafizəsi, vəziyyətin sabitləşməsinə köməklik” olacaq.
“TASS”ın məlumatına görə, KTMT sülhməramlıları üçün bu əməliyyat tarixdə ilkdir. Təşkilatın sülhməramlıları bu ana qədər yalnızca təlimlərdə iştirak ediblər.
Qeyd edək ki, Qazaxıstan Təhlükəsizlik Şurasının iclasında çıxış edən ölkə prezidenti Qasım-Jomart Tokayev etirazları yatırmaq üçün KTMT ölkələrinin liderlərinə müraciət edib. O, Qazaxıstanda baş verən iğtişaşları xarici təcavüz adlandırıb, bunu onunla əsaslandırıb ki, iğtişaşlara səbəb olan terrorçu dəstələr xaricdə təlim keçiblər.