Moskvanın Taqanski rayon Məhkəməsi GitHub saytını “Ağıllı Səsvermə” siyahılarını dərc etdiyinə görə 1 milyon rubl cərimələyib.
Məhkəmə GitHub İT layihələrinin yerləşdirilməsi və birgə inkişafı xidmətini qadağan olunmuş məlumatları silmədiyinə görə cərimələyib. Xidmətlə bağlı protokol 2021-ci ilin sentyabrında Rusiya Federasiyasının Dövlət Dumasına keçirilən seçkilər ərəfəsində Aleksey Navalnının “Ağıllı səsvermə” layihəsinə namizədlər siyahısının dərci ilə əlaqədar tərtib edilib. Bundan əvvəl BBC xəbər vermişdi ki, Roskomnadzorun müxtəlif xidmətlərə, sosial şəbəkələrə və mediaya “qadağan olunmuş” məzmunun silinməməsi ilə bağlı iddialarının əksəriyyəti uşaq pornoqrafiyası və ya narkotik təbliğatı ilə bağlı deyil, Aleksey Navalnı və onun layihələrindən bəhs edən nəşrlərlə bağlıdır.
Qeyd edək ki, GitHub proqram təminatının inkişafı və versiyalara nəzarət üçün hostinq təmin edən ABŞ-a məxsus qlobal bir şirkətdir. 2018-ci ildən bəri Microsoftun törəmə şirkətidir.
