Bakı sakini Zeynal Aslanov polislərin keçirdiyi əməliyyat zamanı evindən götürülən 100 min dolların yarısının qaytarılmadığını deyir.
O, ildirib ki, noyabrın 22-də Bakının Nizami rayon Polis İdarəsinin əməkdaşları tərəfindən onların yaşadığı evdə əməliyyat-axtarış tədbirləri keçirilib. Bu zaman oradan 100 min dollar məbləğində nağd pul, ona aid sənədli ov silahı və digər əşyalar götürülüb.
Həmin vaxt mənzildə olan oğlu polisə təslim olub. O, istintaqdan gizləndiyinə görə axtarışda idi. Pulun götürülmə anını həyat yoldaşının telefonla videoya çəkdiyini deyən Z.Aslanov bu zaman polis əməkdaşının onun əlindən telefonu aldığını bildirib. O, götürülən pulun sayılmasını və protokollaşdırılmasını tələb etsə də, buna imkan verilməyib:
“Mənzildən çıxanda bütün polislər liftə minsə də, pulu götürən əməkdaş pilləkənlə düşdü və Polis İdarəsinə 1 saat gec gəldi. Orada isə pulun 50 min manatını bizə qaytardılar, qalan pulun verilməyəcəyini dedilər. Mənim oğlum davaya görə saxlanılıb, burada maliyyə cinayəti yoxdur, polis nəyə görə dava üstündə saxladığı adamın evindən pulu götürür?
Sonradan binamızın təhlükəsizlik kameralarına baxış keçirəndə gördük ki, pulu götürən polis əməkdaşı həmin gün axşam saatlarında təkrarən bizim binaya gəlib və bir müddət orada qaldıqdan sonra çıxıb gedib.
İstintaq zamanı məlum oldu ki, pulu götürən əməkdaş faktiki olaraq əməliyyatda iştirak etsə də, baxış protokolunda adı yoxdur və bu əməliyyata qatılmaq üçün onların barəsində əmr verilməyib”.