Qırx gündən çoxdur həbsxanada aclıq aksiyası keçirən Gədəbəyin keçmiş icra başçısı Saleh Rüstəmov aksiyanı dayandırıb.
Bu barədə Saleh Rüstəmovun vəkili Bəhruz Bayramov məlumat verib:
“S.Rüstəmov hazırda sistem altındadır. Dünən gecə vəziyyəti pisləşib və müdaxilə olub. Təkidlərdən sonra bu gün günorta saat 1-də aclığı dayandırıb. Saleh bəy ona dəstək verənlərin hamısına təşəkkürünü bildirdi. Xahiş elədi ki, ona görə aclıq keçirənlər də hamısı aclığı dayandırsın. Aclıq aksiyası zamanı S.Rüstəmovun çəkisi 69 kilodan 52-yə düşüb.
S. Rüstəmovun həkimi Adil Qeybulla isə onun səhhəti ilə bağlı bildirib ki, onun təkid və xahişi nəticəsində S.Rüstəmov aclıq aksiyasını dayandırıb:
“O, həm səhhətində yaranan problemləri, həm də xəstə qardaşının ona dəstək olaraq aclıq elan etməsini nəzərə aldı. Hazırda səhhəti nəzarətdədir. Səhhətinin korreksiyası və sonrakı reabilitasiyası üçün tədbirlər davam etdiriləcək. Onunla xeyli söhbət etdik və danışdıq.
Qeyd edək ki, Saleh Rüstəmov qanunsuz həbsinə etiraz olaraq aclıq elan edib. Hazırda Penitensiar Xidmətin Müalicə müəssisəsində müalicə aldığı bildirilir.
Xatırladaq ki, S.Rüstəmov I Qarabağ Müharibəsinin iştirakçısı olub. Gədəbəy rayonunun erməni təcavüzkarlarından təmizlənməsində və uğurlu Başkənd əməliyyatında fəal iştirak edib. Bir müddət əvvəl Rusiyada yaşayan S.Rüstəmov 2018-ci ildə Bakıya gəldikdən sonra həbs edilib. O, narkotik maddələri saxlamaqda ittiham olunub. Sonradan cinayət işinə S.Rüstəmov qanunsuz sahibkarlıqla məşğul olması, gəlirlərini dövlətdən gizlətməsi ittihamları da əlavə olunub.