Şəmkir Rayon Mərkəzi Xəstəxanasının keçmiş baş həkimi Ayaz İbrahimovun cinayət işi baxılması üçün Gəncə Ağır Cinayətlər Məhkəməsinə göndərilib.
İstintaq zamanı müəyyən edilib ki, keçmiş baş həkim vəzifə səlahiyyətlərindən sui-istifadə etməklə həkim məsləhət komissiyasının bütün səlahiyyətlərinin həmin xəstəxananın Terapiya şöbəsinin müdiri vəzifəsində işləmiş Fəxrəddin Quliyevə həvalə edib, F.Quliyevin isə həkim məsləhət komissiyasının üzvü kimi 8 nəfər şəxsə əlillik dərəcəsi təyin edilməsi üçün xəstəxananın həkim-terapevti Əminə Zamanova, Qaranüy kənd tibb məntəqəsinin müdiri Dünya Qarayeva, Şəmkir rayon sakinləri Kifayət Abdıyeva və Həbayət Həsənovanın köməkçiliyi ilə ümumilikdə 20 min 800 manat pul rüşvət alıblar. Həmin şəxslər göndərişlərə saxta diaqnozlar qeyd edərək, onları elektron sistemə daxil ediblər və nəticəndə qanunsuz olaraq əlillik dərəcəsi təyin edilməklə ümumilikdə 40 min manat məbləğində pensiya ödənilməsinə şərait yaradıblar.
Fakt əsasında Cinayət Məcəlləsinin 311.3.2 (rüşvət alma – təkrar törədildikdə) və digər maddələri ilə cinayət işi başlanıb.
Təqsirləndirilən şəxslərdən yalnız Fəxrəddin Quliyev barəsində həbs qətimkan tədbiri seçilib, digər şəxslər barəsində isə polisin nəzarəti altına vermə qətimkan tədbiri seçilib.