Avropa İnsan Haqları Məhkəməsi (AİHM) Azərbaycandan göndərilən beş şikayəti araşdırmağa başlayıb. Araşdılan işlərdən 4-ü ölkə ərazisində blok edilmiş media saytlarının şikayətləridir.
Azadlıq Radiosu və başqa 3 ərizəçi Azərbaycana qarşı iş üzrə ərizəçilər Azadlıq Radiosu (azadliq.org), anaxeber.az, 24saat.org və xural.com saytlarıdır.
Qeyd edilən saytlar Rabitə Nazirliyinin müraciəti üzrə məhkəmə qərarları ilə məhdudlaşdırılıb. Məhkəmə qərarları milli təhlükəsizliyin, ərazi bütövlüyünün, ictimai asayişin, iğtişaşların və cinayətlərin qarşısının alınması maraqları ilə əsaslandırılıb.
Ərizəçilər şikayətlərində Konvensiyanın 10 və 18-ci, eləcə də digər maddələrinin pozulduğunu iddia edirlər.
Məmməd İbrahim Azərbaycana qarşı iş üzrə isə ərizəçinin xuliqanlığa görə həbs edilməsinin qanunsuzluğu ilə bağlıdır.
Ərizəçi iddia edir ki, onun cinayət törətməsinə əsaslı şübhələr mövcud olmayıb və azadlıqdan məhrum edilməsi qanunsuz olub. Belə ki, məhkəmə arşısına çıxarılmazdan əvvəl o, qanunsuz olaraq qırx səkkiz saatdan artıq həbsdə saxlanılıb.
Bundan başqa, ərizədə bildirilib ki, həbs qətimkan tədbirinin seçilməsi ilə bağlı ilkin məhkəmə qərarı daxili qanunvericiliyin tələblərinə zidd olub, çünki həbs qətimkan tədbiri yalnız iki ildən artıq müddətə azadlıqdan məhrum etmə cəzasının nəzərdə tutulduğu cinayətdə ittiham olunan şəxslər barəsində seçilə bilər.