Külli miqdarda mənimsəmə, rüşvət alma, vəzifə səlahiyətlərindən sui-istifadə etmə və vəzifə saxtakarlığında təqsirli bilinən, hazırda həbsdə olan Yevlax rayonunun keçmiş icra başçısı Qoca Səmədova və yaxınlarına məxsus xeyli ev, torpaq sahələri, obyektlər müsadirə olunub.
Qoca Səmədovun müsadirə edilən əmlakları bunlardır:
– Hər birinin 377 min və 220 min manat dəyəri olan iki mənzil;
– Yevlax şəhərində 63 min 700 manat və 57 min 400 manatlıq iki obyekt;
– Yevlaxın Qoyunbinəsi kəndində ümumi dəyəri 61 min 800 manatlıq beş müxtəlif torpaq sahəsi;
– Rayonun Havarlı kəndində 18 min manatlıq torpaq sahəsi;
– Goranboy rayonunun Aşağı Ağcakənd kəndində cəmi 50 min 950 manat qiyməti olan üç ayrı torpaq sahəsi;
– Elə həmin kənddə 0.37 hektar ərazi və orada tikilmiş iki fərdi yaşayış evi – dəyəri 321 min manat;
– Yevlax şəhəri, Aran qəsəbəsində 200 min manatlıq “Su səsi” restoranı;
– Yevlax rayonunun Salahlı kəndində 2 min 159 kvadratmetrlik, 228 min manat dəyərində obyekt;
– Tikintisi yarımçıq qalmış, 251 min manatlıq ikimərtəbəli uşaq bağçası.
30 min manat nağd pul.
Məhkəmədə Yevlax Rayon İcra Hakimiyəti 1 milyon 546 min, Əmək və Əhalinin Sosial Müdafiəsi Nazirliyinin tabeliyindəki “DOST” İş Mərkəzi isə 58 min manatlıq mülki iddia qaldırıb. Şəki Ağır Cinayətlər Məhkəməsi bu iddiaları təmin edib. Hökmə əsasən keçmiş icra başçısı və yaxınlarının müsadirə olunan mülkiyyətinin bir hissəsi adları çəkilən qurumlara dəymiş ziyanın ödənilməsinə yönəldiləcək. Qalan hissə, o cümlədən tikintisi yarımçıq qalmış uşaq bağçası dövlət nəfinə köçürüləcək.
Q.Səmədov məhkəmədə qeyd edilən uşaq bağçası haqda danışarkən deyib ki, hər rayonda özəl uşaq bağçası tikilməsi tapşırığı gəlmişdi. Bu tapşırığa uyğun olaraq bəzi sahibkarlarla görüşüb onlara bağça tikməyi təklif etsə də razılıq verən olmamışdı. Ona görə də məcbur olub özü bu işi görmək qərarına gəlmişdi. O, əvvəl bağçanı oğlunun adına sənədləşdirmək istəyib, lakin sonradan şirkətin adına rəsmiləşdirib.
Keçmiş icra başçısı etiraf edib ki, bir sahibkar Yevlax Rayon İcra Hakimiyətinin tenderlərində qalib gəlib müxtəlif işlər görürdü. Həmin sahibkar buna görə ona cəmi 100 min manat pul ve1rmişdi. Həmin pulu da bağçanın tikintisinə xərcləyib.
Qeyd edək ki, Qoca Səmədov 7 il 3 ay azadlıqdan məhrum edilməsi barədə Şəki Ağır Cinayətlər Məhkəməsinin hökmündən apellyasiya şikayəti verib. Şikayətə hazırda Şəki Apellyasiya Məhkəməsində baxılır. Keçmiş icra başçısı sağlamlıq vəziyətinin nəzərə alınaraq həbsdən buraxılmasını istəyir.
Xatırladaq ki, 61-yaşlı Qoca Səmədov 2011-2019-cu illərdə Yevlax Rayon İcra Hakimiyətinin başçısı vəzifəsində işləyib. Bundan əvvəl isə o, 5 il icra başçısının müavini və birinci müavini olub.
2019-cu ilin dekabrında DTX əməkdaşlarının keçirdiyi əməliyyat nəticəsində həbs olunan Qoca Səmədov vətəndaşların ictimai işlərə cəlb edilməsi məqsədilə əməkhaqqı kimi ayrılan vəsaitləri ələ keçirməkdə itiham edilib. O, müxtəlif dövlət orqanlarına işçi kimi rəsmiləşdirilmiş 133 nəfər üçün açılan maaş kartlarından çıxarılan 236 min manat vəsaiti mənimsəyib. Q.Səmədov həmçinin 2017-2019-cu illərdə Yevlaxda abadlıq işləri üçün büdcədən ayrılan və müxtəlif şirkətlərin hesablarına köçürülmüş vəsaitlər nağdlaşdırılandan sonra onun 616 min manatını geri alıb mənimsəməkdə ittiham edilib.
Qoca Səmədov və ondan sonra həbs olunan Ağstafa, Neftçala, Biləsuvar, İmişli, Kürdəmir, Cəlilabad və Şəmkir rayonlarının icra başçılarına qarşı vəzifə səlahiyyətlərindən sui-istifadə etmə, külli miqdarda rüşvət alma, mənimsəmə kimi ittihamlar irəli sürülüb.