Həyat yoldaşını güllələyərək öldürməkdə təqsirləndirilən Sabunçu rayon Məhkəməsinin keçmiş hakimi Fəqan Əhmədovun cinayət işi üzrə məhkəmə prosesi başa çatıb.
Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən prosesdə dövlət ittihamçısı çıxış edib. Prokuror hadisənin qəsdən adam öldürmə kimi qiymətləndirilməsini və F.Əhmədova 11 il azadlıqdan məhrum etmə cəzası verilməsini istəyib.
Daha sonra F. Əhmədovun vəkilləri çıxış edib və onun hadisəni qəsdən deyil, ehtiyatsızlıqdan törətdiyini bildiriblər. Onlar F.Əhmədovun barəsində ədalətli qərar verilməsini istəyiblər.
Daha sonra F.Əhmədova son söz verilib. O, ittihamla razı olmadığını bildirib:
“İttiham aktında qeyd olunanlar fərziyədir. Nə vaxtdan 15 il bir yerdə yaşadığın arvadına yüksəl tonda nəsə deməyin təhqir sayılır?! Bir insanı qəsdən öldürmək üçün bunu arzulamalısan. Mənim onu öldürməyim sadəcə şit bir zarafatın nəticəsi idi”.
Hakimlər müşavirədən qayıtdıqdan sonra hökm elan olunub. Məhkəmənin qərarı ilə F. Əhmədova 10 il azadlıqdan məhrum etmə cəzası verilib. O, cəzasını ciddi rejimli cəzaçəkmə müəssisəsində çəkəcək.
Qeyd edək ki, Sabunçu rayon Məhkəməsinin hakimi vəzifəsində işləmiş F. Əhmədov bu ilin mayın 30-da Nardaran qəsəbəsi, “Ləhiş bağları”nda birgə yaşadıqları evdə aralarında yaranmış mübahisə zamanı ov tüfəngindən atəş açaraq arvadı Pərvanə Əhmədovanı öldürüb.