Son vaxtlar digər ölkələrdə olduğu kimi, Azəzbaycanda da koronavirusa yoluxma və ölüm halları artmaqdadır.
COVİD-19 virusuna yoluxan və vəfat edənlər arasında məhkəmə hakimləri də var.
Koronavirusdan vəfat edən hakimlər bunlardır:
2020-ci ilin iyun ayında Bakı Apellyasiya Məhkəməsinin hakimi Namiq Məmmədov 55 yaşında koronavirusdan həyatını itirib.
O, 2000-2007-ci illərdə Ağdam Rayon Məhkəməsinin, 2007- 2013-cü illərdə Şəki Apellyasiya Məhkəməsinin, 2013-2017-ci illərdə Şirvan Apellyasiya Məhkəməsinin hakimi olub. 2017-ci ildən Bakı Apellyasiya Məhkəməsinin hakimi vəzifəsində fəaliyyətini davam etdirirdi.
2020-ci ilin dekabr ayında Şirvan Apelyasiya Məhkəməsinin Kommersiya kollegiyasının hakimi Fuad Soltanov 48 yaşında koronavirusdan dünyasını dəyişib.
Bu ilin yanvar ayında Ali Məhkəmənin Cinayət Kollegiyasının hakimi İnqilab Nəsirov 57 yaşında koronavirusdan vəfat edib.
İnqilab Nəsirov 2003-2004-cü illərdə Mərkəzi Seçki Komissiyasının katibi, 2004-2007-ci illərdə Apelyasiya Məhkəməsi sədrinin müavini, 2005-2007-ci illərdə Məhkəmə-Hüquq Şurasının üzvü, 2007-2010-ci illərdə isə Ağır Cinayətlərə dair İşlər üzrə Hərbi Məhkəmənin sədri vəzifələrində çalışıb. 2011-ci ilin yanvar ayının 1-dən Ali Məhkəmənin hakimi olub.
Bu ilin aprel ayında Şəki Ağır Cinayətlər Məhkəməsinin hakimi Rəşid Hüseynov 62 yaşında koronavirusdan vəfat edib.
R. Hüseynov uzun müddət prokurorluq orqanlarında çalışıb. O, 1986-1992-ci illərdə Ağdam rayon Hüquq Məsləhətxanasında vəkili, 1992-1996-ci illərdə Qarabağ Qarnizonu Hərbi Prokurorluğunda müstəntiq, böyük müstəntiq, 1996-1999-cu illərdə Respublika Hərbi Prokurorluğunun İstintaq idarəsində böyük müstəntiq, 1999-2008-ci illərdə isə Hərbi prokurorluqlarda istintaqa nəzarət şöbəsinin prokuroru, böyük prokuroru, böyük prokuror-metodist vəzifələrində işləyib. 2008-ci ildən isə hakimlik fəaliyyəti ilə məşğul olub.
2008-2011-ci illərdə Ağır Cinayətlərə dair İşlər üzrə Hərbi Məhkəmənin hakimi, 2011-2013-cü illərdə Lənkəran Ağır Cinayətlər Məhkəməsinin hakimi olub. 2013-cü ildən Şəki Ağır Cinayətlər Məhkəməsinin hakimi vəzifəsində çalışırdı.