Azərbaycan Respublikası Təhsil Nazirliyinin tabeliyində olan 11 nömrəli İnteqrasiya Təlimli İnternat Məktəbinin direktoru işləmiş Gülnarə Abdullayeva barəsində Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin 179.3.2 (Mənimsəmə külli miqdarda törədildikdə), 308.1 (Vəzifə səlahiyyətlərindən sui-istifadə) və 313-cü (Vəzifə saxtakarlığı) maddələri ilə cinayət işi başlanıb.
Bu barədə Baş Prokurorluq məlumat verib. Məlumatda bildirilir ki, 2020-ci ilin yanvar ayından 2021-ci ilin avqust ayınadək olan müddətdə G.Abdullayeva şəxsən və həmin məktəbin əməkdaşları vasitəsilə rəsmi sənədlərə bilə-bilə yalan məlumatlar daxil etməklə, işə gəlməyən müəllimlərin guya işə gəlməsi, müəllim və tərbiyəçilərin dərs saatlarının artıq göstərilməsi, gündəlik məktəbə gələn uşaqların sayının artıq göstərilməsi ilə onların qidalanması üçün tələb olunan qida məhsulları və içməli suyun artıq rəsmiləşdirilməsinə nail olmaqla 88 622 manat pul vəsaitini nağdlaşdıraraq mənimsəyib.
G.Abdullayevanın otağına keçirilmiş baxış zamanı ayrı-ayrı şəxslərin adına olan 4 ədəd plastik kart, işçilərə pul vəsaiti verməsi ilə bağlı qeydlərin aparıldığı dəftərçə aşkar olunaraq götürülüb.
Qeyd edək ki, G.Abdullayeva məktəbdəki neqativ hallarla bağlı dəfələrlə mətbuatın gündəminə gəlib. Hələ 2014-cü ilin mayında internat məktəbində 10 yaşlı uşaqlar arasında mübahisə düşmüşdü. Nəticədə uşaqlardan biri digərinin üzərinə qaynar su tökərək yandırmışdı. Şagird F. Quluzadə qulaq və boyun nayihəsindən ağır yanıq xəsarətləri almışdı. Həmin vaxt qeyd edilirdi ki, bu hadisə internat rəhbərliyi tərəfindən gizlədilməyə çalışılıb. Hətta xəstəxanaya və polis bölməsinə belə bu haqda məlumat verilməyib.
2014-cü ilin noyabrında isə 11 nömrəli İnternat Məktəbi ikinci xoşagəlməz hadisə ilə gündəm olub. Bu dəfə sosial şəbəkələrdə yayılan görüntülərdə azyaşlıların bir-birini çimizdirməsi əks olunurdu. Qeyd edilirdi ki, internat məktəbində xeyli sayda tərbiyəçi olsa da, uşaqlar soyuq tualetdə şlanq vasitəsilə çimirlər.
Həmin il baş vermiş hər iki hadisə ilə bağlı Gülnarə Abdullayevanın cavabı bənzər olmuşdu. O, hər iki hadisəni ört-basdır etməsi ilə bağlı xəbəri təkzib etmişdi.
.jpg)
Bundan başqa, G. Abdullayeva mətbuatın gündəminə fantastik tender məbləğləri ilə də gəlib. İnternat məktəbin 20 000 kubmetr içməli suyun satınalması üçün 80 000 manat dəyərində müqavilə bağladığı məlum olub.