Rusiyada azərbaycanlı Abdullayev Vəkil Yaqub oğluna atəş açaraq onun ölümünə səbəb olan polis məmuru Aleksandr Qusyev həbsdən azad edilib.
Bu barədə Rusiya İstintaq Komitəsinin nümayəndəsi Svetlana Petrenko məlumat verib: “Bu gün İstintaq Komitəsinin sədri Aleksandr Bastrıkinin tapşırığına əsasən, müstəntiq polis barəsində həbs qətimkan tədbirini dəyişərək başqa yerə getməmək və lazımi davranış haqqında iltizam seçib.
Xatırladaq ki, hadisə mayın 28-da baş verib. Hərəkətdə olan “Toyota” avtomobilini saxlayan yol polisi əməkdaşları maşındakı gəncləri polis bölməsinə aparmağa çalışıblar. Bu zaman polislərdən biri – baş leytenant Aleksandr Qusyev yoldaşını polislərin əlindən almağa çalışan 19 yaşlı Vəkil Abdullayevin başından güllə ilə vurub. V.Abdullayev xəstəxanaya yerləşdirilsə də, onun həyatını xilas etmək mümkün olmayıb.
Qeyd edək ki,“Russia Today” telekanalının erməni əsilli baş redaktoru Marqarita Simonyan ciddi cəhdlə polis müfəttişinin tərəfini tutmuş, onun təsadüfən atəş açdığını iddia etmişdi.
Qusyevin lehinə danışanlardan biri də ABŞ-dakı casus qalmaqalı və həbs həyatından sonra məşhurlaşan, “Russia Today” telekanalının əməkdaşı, RF İctimai Palatasının üzvü, Vahid Rusiya partiyasından dövlət Dumasına namizədliyini irəli sürmüş Mariya Butina oldu. O, V.Abdullayevi öldürən A.Qusyevin “100% doğru yolda” olduğunu bildirib və hətta buna görə polis müfəttişinin mükafatlandırılmasını istəyib. Butina A.Qusyevə qarşı irəli sürülmüş bütün ittihamların götürülməsini tələb etmişdi.
Onu da qeyd edək ki, V.Abdullayev Gürcüstan vətəndaşı olsa da rəsmi Tbilisidən məsələ ilə bağlı hər hansı mövqe bildirilməyib.