56 yaşlı çex milyarder Peter Kellner Alyaskada helikopter qəzasında həlak olub.
Bu barədə “Reuters” agentliyi məlumat verib.
İlkin məlumatlara görə, helikopter Knik buzlağının yaxınlığında qəzaya düşüb. Bundan əlavə, qəza nəticəsində Çex Respublikasının başqa bir vətəndaşı Benjamen Laroşe, iki bələdçi və pilot da həlak olub.
Ölənlərin meyitləri Milli Qvardiya və xilasetmə dəstələri tərəfindən tapılıb. Cəsədlər məhkəmə tibbi ekspertizasına təhvil verilib.
“New York Times” nəşrinə görə, Kellnerin göyərtədə olduğunu helikopteri kirayəyə götürən otel açıqlayıb.
Hadisədən sonra səlahiyyətlilər bölgəyə bazar ertəsinə qədər uçuş qadağası tətbiq ediblər. Milli Nəqliyyat Təhlükəsizliyi Şurası qəzanın səbəblərini araşdırır.
Qeyd edək ki, Peter Kellner “PPF Group N.V.”-nin qurucusu və əsas səhmdarıdır. “Forbes” keçən il onun sərvətini 293 milyard kron və ya 12,7 milyard dollar olaraq qiymətləndirmişdi. Nəşrə görə, o artıq otuz ildir ki, Çexiya milyarderləri arasında liderliyini qoruyur.