Milli Məclisin martın 9-da keçirilən iclasında “Ailə məcəlləsi”nə təklif edilən dəyişikliklər qəbul olunub. Dəyişikliyə görə uşaqların qohumları tərəfindən övladlığa götürülməsi prosesi asanlaşdırılır.
Övladlığa götürmək istəyən şəxsin təlimlərə cəlb edilməsi, uşağın valideynə, valideynin uşağa uyğun seçilməsi, hər iki tərəfin uşaqların yerləşdiyi müəssisədə görüşünün təşkili, uşağın sınaq müdətinə övladlığa götürən şəxsin evində yaşaması kimi tələblər ləğv edilib.
Milli Məclisin iclasında “Mülki Prosessual Məcəllə”yə təklif edilən dəyişiklik də qəbul olunub. Dəyişikliyə əsasən, əcnəbi və vətəndaşlığı olmayan uşağın (Azərbaycanda yaşayan) əcnəbi və vətəndaşlığı olmayan tərəfindən övladlığa götürülməsi ilə bağlı tələb olunan sənədlərə əlavələr edilib. Bundan sonra övladlığa götürülmə barədə ərizəyə həm də uşağın valideynlərinin və uşağın vətəndaşı olduğu dövlətin səlahiyyətli orqanının razılığı əlavə olunacaq. Bundan başqa, həmin dövlətin qanunvericiliyinə və Azərbaycanın tərəfdar çıxdığı beynəlxalq müqaviləyə əsasən tələb olunduğu halda, uşağın da övladlığa götürülməyə razılığı əlavə oluna bilər.
Qeyd edək ki, Azərbaycan Respublikası Ədliyyə Nazirliyinin məlumatlarına əsasən, 2019-cu ildə 345 nəfəri oğlan, 315 nəfəri isə qız olmaqla 660 uşaq, o cümlədən əcnəbilər və vətəndaşlığı olmayan şəxslər tərəfindən 8-i qız olmaqla 14 uşaq övladlığa götürülüb. Bu uşaqlardan 175-i 1 yaşadək, 296-sı 1-5 yaş, 115-i 6-10 yaş, 74-ü isə 11-17 yaş arasında olub.