Almaniya hökuməti Rusiya müxalifətinin liderlərindən olan Aleksey Navalnının zəhərləndiyini bəyan edib.
Virtualaz.org yerli KİV-ə istinadən bildirir ki, bunu jurnalistlərə açıqlamasında Almaniya Nazirlər Kabinetinin rəsmi nümayəndəsi Şteffen Zaybert deyib.
Ş.Zaybertin sözlərinə görə, A. Navalnıdan götürülən nümunələr üzərində aparılan toksikoloji testlərdə “Noviçok” qrupuna aid olan sinir iflicedici maddənin izləri tapılıb.
O bildirib ki, Kansler Angela Merkel, Maliyyə naziri Olaf Şoltz, Xarici İşlər naziri Hayko Maas, Daxili İşlər naziri Horst Sofer, Ədliyyə naziri Kristine Lambreçt və Müdafiə naziri Anneqret Kramp-Karrenbauer bu məsələni müzakirə edərək müvafiq addımların atılması barədə razılığa gəliblər.
“Federal hökumət bu aktı qətiyyətlə qınayır. Rusiya hökumətindən hadisə ilə bağlı izah tələb edilir. Navalnının xanımına və həkimlərə müayinənin nəticələri barədə məlumat verilib. Xarici İşlər Nazirliyi isə Rusiya səfirinə istintaqın nəticələri barədə məlumat verəcək.
Federal hökumət Aİ və NATO-dakı müttəfiqlərini Federal Xarici İşlər Nazirliyi vasitəsi ilə istintaqın nəticələri barədə məlumatlandıracaq. Tərəfdaşlarla müvafiq ortaq reaksiya müzakirə ediləcək. Federal hökumət həmçinin Kimyəvi Silahların Qadağan olunması Təşkilatı ilə təmas quracaq. Hökumət Almaniya Bundestaqındakı parlament qruplarını da məlumatlandıracaq”, – deyə Şteffen Zaybert açıqlamasında vurğulayıb.
Xatırladaq ki, Rusiya müxalifətinin liderlərindən biri, “Gələcəyin Rusiyası” partiyasının sədri Aleksey Navalnı avqustun 20-də təyyarə ilə Tomskdan Moskvaya uçarkən qəfildən halı pisləşib və təyyarə Omskda təcili eniş edib. O, zəhərlənmə şübhəsi ilə Omskda xəstəxanaya yerləşdirildikdən bir neçə gün sonra Berlinin “Charite” klinikasına aparılıb.