Rusiyaya məxsus dron Ukraynanın mərkəzində yerləşən Dolınska şəhərində yaşayış binasına zərbə endirib və nəticədə azı üç nəfər yaralanıb.
Hücumun baş verdiyi Kirovohrad vilayətinin qubernatoru Andriy Raykoviç Telegram-da bildirib ki, hakimiyyət orqanları binadan onlarla sakini təxliyə edib. Yaralananlar arasında bir ana və iki uşaq var.
Bu hücum Rusiyanın gecə ərzində Ukraynaya qarşı genişmiqyaslı hava hücumlarının bir hissəsi olub. Ukrayna ordusunun məlumatına görə, 176 dron hücumu qeydə alınıb.
Ukraynanın hava hücumundan müdafiə qüvvələri 103 dronu vurub. Müdafiə əməliyyatları Çerkası, Çernihiv, Dnipropetrovsk, Xarkiv, Xerson, Kirovohrad, Kyiv, Mikolayiv, Poltava, Sumı, Vinnıtsa və Jıtomir bölgələri üzərində aparılıb.
Çerkası qubernatoru İqor Taburets Telegram-da bildirib ki, vurulan dronun qalıqları bölgədə dörd evi zədələyib.
Rusiyanın Müdafiə Nazirliyi çərşənbə axşamı verdiyi açıqlamada Ukraynanın beş dronunu məhv etdiklərini bildirib. Bunlardan dördü Voronej, biri isə Belqorod bölgəsi üzərində vurulub.
Hər iki region Rusiya-Ukrayna sərhədi boyunca yerləşir və Ukraynanın dron hücumlarının tez-tez hədəfinə çevrilir.
Voronej qubernatoru Aleksandr Gusev Telegram-da hər hansı bir tələfat və ya ziyan qeydə alınmadığını açıqlayıb. (Amerikanın səsi)