Azərbaycan ordusunun xüsusi təyinatlı qüvvələrinin təlimləri başlayıb. Təlimlər Azərbaycanın cənub sərhədlərinə yaxın ərazilərdə keçirilir. Bu barədə bu gün Müdafiə Nazirliyi bildirib.
Xüsusi təyinatlı qüvvələrin komandanı, general-leytenant Hikmət Mirzəyevin rəhbərliyilə keçirilən təlim planına əsasən hərbi hissələr “Həyəcan” siqnalı ilə qaldırılıb.
Daimi dislokasiya məntəqələrini tərk edən xüsusi təyinatlılar əməliyyat rayonlarına çıxarıldıqdan sonra komandirlərin məruzələri dinlənilib və tapşırıqlar dəqiqləşdirilib.
Hərbi Hava Qüvvələrinin, raket və artilleriya qoşunlarının təlimə cəlb olunan hissə və bölmələri təyin edilmiş aerodromlara və rayonlara cəmləşdirilib. Digər qoşun növləri ilə qarşılıqlı əlaqə təşkil edilib”, – məlumatda deyilir.
Plana əsasən təlimin növbəti mərhələlərində xüsusi təyinatlı bölmələr onları dəstəkləyən Hərbi Hava Qüvvələri, eləcə də raket və artilleriya qoşunlarının bölmələri ilə qarşılıqlı əlaqədə bir sıra tapşırıqları icra edəcəklər.
Qeyd edək ki, təlim çərçivəsində xüsusi təyinatlı bölmələrin müəyyən xüsusi hazırlıqları üzrə ayrıca yoxlamalar keçirilir.
Məlumatda deyilir ki, təlimlər müdafiə nazirinin təsdiq etdiyi 2022-ci il üçün döyüş hazırlığı planına uyğun olaraq keçirilir.
Qeyd edək ki, oktyabrda İran İslam İnqilabı Keşikçiləri Korpusu qüvvələri Azərbaycan sərhədinin yaxınlığında miqyaslı təlimlər keçirib. Bu təlimlər İran generallarının Azərbaycanın ünvanına hədə dolu bəyanatları ilə müşayiət olunub.