Moldovadaya sığınan azərbaycanlılar: “Səfirlik deyir göndərəcəyik…”

Rusiyanın Ukraynada başladığı müharibədən qaçıb Moldovaya sığınan bəzi azərbaycanlılar bir neçə gündür ki, Azərbaycana göndərilmələrini gözləyirlər.

Üç azərbaycanlı ailə ilə birgə Ukraynanın Dnepr bölgəsindən qaçqın düşmüş Hüseyn Qəmbərov BBC News Azərbaycancaya deyib ki, Moldovadakı Azərbaycan səfirlyi onları neçə gündür ki, “get-gələ salıb”.

Azərbaycan Xarici İşlər Nazirliyindən (XİN) BBC News Azərbaycancaya bildirilib ki, Ukraynadan sərhəd ölkələrə qaçmağa məcbur qalan azərbaycanlılar növbə ilə ölkəyə təxliyə edirlər və bu zaman, “məhz həssas qrup adlandırılmış körpələrin, qadınların və xəstələrin” təxliyəsinə üstünlük verilir.

“Adambaşına 80 dollar istəyirlər”

Moldova paytaxtı Kişinyovda təxliyə gözləyənlərdən birinin anası BBC-yə deyib ki, oğlu epilepsiya xəstəsidir və mütəmadi dərman içir: “Amma indi dərmanı bitib. Hər an sudurğası tuta bilər. Köməyə ehtiyacı var. Avtobusla və ya təyyarəylə, nəylə olsa, Azərbaycana getməyi lazımdır”.

“Moldovadakı səfirlik bizə “bu gün-sabah sizi göndəcəyik” deyə-deyə artıq 5 gündür ki, burada qalmışıq – Ukraynanın Dnepr bölgəsindən başqa azərbaycanlı ailələrlə birgə təxliyə gözləyən Hüseyn Qəmbərov BBC News Azərbaycancaya deyib, – eyni zamanda kənardan kimlərsə bizə yaxınlaşıb ödəniş əsasında, adambaşına 80 dollara bizi Moldovadan Rumıniyaya və ya Türkiyə ilə sərhədə çatdırmağı təklif edirlər, oradan da əlavə 50 avroya Azərbaycana…”

Hüseyn Qəmbərovun sözlərinə görə, aralarında 3 və 5 aylıq körpələrin olduğu 6 uşaq daxil 12 nəfər üçün adambaşına 80 dollar ödəməyə imkanları yoxdur: “Ümumilikdə 1000 dolları haradan tapıb ödəyək?”

Azərbaycanlı qaçqın bildirib ki, Azərbaycanın Moldovadakı səfirliyi onları ödənişsiz yola salmağı vəd edib və pullu xidmət təklif edən adamların “səfirliyə aidiyyati olmadığını” deyib.

Hüseyn Qəmbərov əlavə edib ki, ödənişli xidmət təklif edənlər əvvəlcə onlarla azərbaycanca danışıblar, “sonra keçiblər türkcə danışmağa… Azərbaycan səfirliyi isə deyir ki, onların bizə heç bir aidiyyati yoxdur”.

“Ukraynadan da Moldovaya öz hesabımıza, iki taksi tutub gəlmişik. 650-700 kilometr yol keçmişik. Yol boyu tıxaclar var idi”, – o qeyd edib.

Yazı masalarından çarpayı

Hazırda azərbaycanlı ailələr Moldovada bir məktəb binasında qalırlar.

“Məktəbdə uşaqların oturduğu yazı masalarını düzmüşük, üstünə salmaq üçün matras veriblər, bu gün axşam təzə adyal payladılar. Taxtaların üstündə yatırıq. Bir otaqda elə biz özümüzük, 3 ailə. Qaldığımız yer toz-torpaqlı olduğundan uşaqlardan biri artıq xəstəliyə tutulub – Hüseyn Qəmbərov deyib, – mənim özüm üçün problem yoxdur, nə qədər olsa qalaram, amma uşaqlar var 3-5 aylıq, uşaqdır hamısı, bu uşaqlara heç baxan yoxdur… Səfirlik elə deyir göndərəcəyik, bu gün- sabah, bu gün-sabah…”

Azərbaycanlı qaçqınlar təxliyə üçün Azərbaycan XİN-də qeydiyyatdan keçiblər və onlarla əlaqə saxlanılıb: “Deyiblər ki, avtobusla və ya qatarla sərhədi keçib gedin Polşaya və ya Moldovaya, sizi təxliyə edəcəklər”, – Hüseyn Qəmbərov bildirib.

“Dolanışığımız var idi. May ayında Azərbaycana qayıtmaq fikrimiz var idi – alınmadı. Bütün işimizi, gücümüzü, nəyimiz var idi, atdıq, bir paltar götürdük. Biz orada olanda hərbi əməliyyatlar getməsə də, gündə 4-5 dəfə həyəcan siqnalı çalınırdı. Səhərlər saat 6-da, 7-də, 8-də həyəcan siqnalının səsinə oyanırdıq, uşaqlar çığırışır-ağlaşırdılar. Odur ki, onları götürüb çıxmaq qərarına gəldik….”

“Təxliyə üçün avtobus və ya təyyarə gözlənir”

Moldovanın Azərbaycandakı səfirliyinin qaynar xəttindən BBC News Azərbaycancaya bildirilib ki, burada toplaşmış Azərbaycan vətəndaşlarının təxliyəsi üçün avtobus və təyyarə gözlənilir.

Qaynar xətdən deyilib ki, Moldova ərazisində əsasən Ukraynadan gəlmiş azərbaycanlıların çoxunu göndəriblər, az adam qalıb, onları da ya təyyarə, ya avtobusla göndərəcəklər.

Azərbaycan XİN martın 8-dək Azərbaycana 4 mindən çox azərbaycanlı təxliyə olunub. Onların arasında çarter reysləri ilə 3 minə yaxın, quru yolla təxliyə olunanlar isə 2077 nəfər təşkil edib.(bbc.com)