Bakıda əməliyyat nəticəsində saxlanılıb polis şöbəsinə aparılan şəxs orada ölüb.
Hadisə Binəqədi Rayon 4-cü Polis Şöbəsində baş verib. Polis əməkdaşlarının saxladığı 1980-ci il təvəllüdlü Məmmədov Gəncəvi Cahangir oğlu orada vəfat edib. Yaxınları onun polis şöbəsində döyülərək öldüyünü deyiblər. Onlar dəfn zamanı meyitin üzərində xəsarətlər gördüklərini bildiriblər.
Daxili İşlər Nazirliyinin inspektoru, polis mayoru Anar Qafarov isə döyülmə faktını təkzib edib:
“Gəncəvi Məmmədov narkotik vasitələrin qanunsuz dövriyyəsində və oğurluqda şübhəli bilindiyi üçün saxlanılaraq Binəqədi Rayon Polis İdarəsinin 4-cü Polis Şöbəsinə gətirilib. Şöbəyə çatan zaman o, ürəyində ağrılarının olması barədə polisə məlumat verib. Dərhal bu barədə təcili tibbi yardıma məlumat verilib. Təcili tibbi yardım gələnə kimi isə həmin şəxsə polis əməkdaşları ilkin yardım göstəriblər. Amma edilən cəhdlərə baxmayaraq, Gəncəvi Məmmədov Şöbənin dəhlizində dünyasını dəyişib.
İlkin müayinələr zamanı onun ürək çatışmazlığından dünyasını dəyişdiyi məlum olub. Polis şöbəsində həmin şəxsə xəsarət yetirildiyi və ya fiziki zor tətbiq edildiyi barədə səslənən iddialar tamamilə əsassız və yalan informasiyalardır. Həmin şəxs saxlanılandan sonra şöbədə xidməti otağa və ya müvəqqəti saxlama yerinə aparılmayıb, dəhlizdə olarkən ürək ağrılarından şikayət etməyə başlayıb”.
Ailə üzvləri Gəncəli Məmmədovun heç bir xəstəliyinin olmadığını, əvvəllər məhkum edilmədiyini və narkotik vasitələrdən istifadə etmədiyini deyiblər.
