Ata Abdullayevin cinayət işi üzrə məhkəmə istintaqı yekunlaşıb.
Dekabrın 21-də Bakı Ağır Cinayətlər Məhkəməsində hakim Fikrət Qəribovun sədrliyi ilə keçirilən məhkəmə iclasında sənədlərin tədqiqi zamanı məlum olub ki, Ata Abdullayev hərbi xidmətdən yayındığına görə 2004-cü ildə Nəsimi Rayon Məhkəməsinin hökmü ilə məhkum edilib. 2014-cü ildə isə O, bank kartlarından onlayn qaydada pul çəkdiyinə görə MTN əməkdaşları tərəfindən saxlanılıb və Bakı Ağır Cinayətlər Məhkəməsinin hökmü ilə oğurluq və kompüter sisteminə qanunsuz daxil olmada təqsirli bilinərək 7 il şərti cəza alıb.
Hazırki məhkəmə iclasında Ata Abdullayev çıxış edərək bildirib ki, onun zərərçəkmiş kimi tanınan adamlardan pul tələb etməsini sübut edən fakt yoxdur. O, heç kimi hədələmədiyini, tapançanı televizorda gördüyünü deyib: “Fakt ortaya qoyulsa ki, mən deyildiyi kimi Elmar Əliyevdən hədə-qorxu ilə telefon almışam, evimi satıb 100 min ödəməyə hazıram. Dostlarım var ki, mənə görə ölümə hazırdılar. Ortaya sübut qoyulsun, bir telefon əvəzinə dördünü qaytarım.
2009-cu ildə Neft Akademiyasındakı terror zamanı binaya birinci daxil olan mən olmuşam. Yaralıların və meyitlərin daşınmasına kömək eləmişəm. Hüquq-mühafizə orqanlarına da birinci mən məlumat vermişəm. Əgər mən olmasaydım, orada ölənlərin sayı xeyli çox olardı”.
Daha sonra məhkəmə istintaqının yekunlaşdığı elan edilib.
Dövlət ittihamçısı (prokuror) Ata Abdullayevin Cinayət Məcəlləsinin 182.2.2 və 182.2.4 maddələri ilə təqsirli bilinərək 9 il azadlıqdan məhrum edilməsini istəyib.
Məhkəmənin növbəti iclası dekabrın 28-də davam etdiriləcək.
Qeyd edək ki, özünü bloqer adlandıran Ata Abdullayev 4 nəfərdən hədə-qorxu ilə pul tələb etməkdə ittiham edilir. Həmin şəxslər iş üzrə zərər çəkmiş kimi tanınıb. O, Dövlət Təhlükəsizliyi Xidmətinin (DTX) əməkdaşları tərəfindən saxlanılıb.
