İyunun 3-də ictimai fəal Rəbiyyə Məmmədovanın 59 yaşlı anası Bəsti Məmmədova fiziki hücuma məruz qalıb.
Bu barədə ictimai fəal feysbuk sosial şəbəkəsində məlumat yayıb.
R.Məmmədova hadisənin Binəqədi Mənzil Kommunal və Texniki Xidmət Sahələrinin 102 saylı mənzil-kommunal istismar sahəsində baş verdiyini deyib. O, anasının süpürgəçi işlədiyini və son vaxtlar iş yoldaşı tərəfindən bullinqə məruz qaldığını bildirib:
“İyunun 3-də, saat 17:55 radələrində iş yoldaşı anamın çantası ilə anamın başına, üzünə zərbələr endirməyə başlayıb, saçını yolub. Anamın dizi xəstədir, işdə də bilirlər ki, onun dizində problem var, ayağı ilə dizinə təpik vururmuş. İş yoldaşları həmin şəxsin əlindən anamı alıblar. Bu hadisəyə qədər anası dəfələrlə ona hücum edən şəxs tərəfindən şifahi təzyiqlərə məruz qalıb. Mənim sosial şəbəkələrdəki şəkillərimi, videolarımı anamın iş yoldaşlarına göstərirmiş, işdə anamı təqib edirmiş. Deyirmiş ki, sənin qızın fahişədir, sənin qızın lezbiyandır, qızının ipini yığ. Niyə qızına qarşı ölçü götürmürsən?”
İctimai fəal anasına qarşı təzyiqin sifarişli olduğunu bildirərək, Daxili İşlər Nazirliyinin 102 xidmətinə şikayət etdiyini, bundan sonra Binəqədi rayon Polis İdarəsinin 5-ci polis bölməsinə ərizə verdiyini, şənbə gününə ekspertiza təyin edildiyini bildirib.
R.Məmmədova onu da deyib ki, iyunun 4-də anasını müayinəyə qəbul etmədikləri halda, təcavüzkar özü “ekspertizadan” keçib. R.Məmmədova qadından harasında xəsarət olduğunu göstərməsini istədikdə qadın üzünü bağlayaraq tələsik uzaqlaşıb.
Qeyd edək ki, Rəbiyyə Məmmədova daha çox məişət zorakılığından əziyyət çəkən qadınları müdafiə etməsi ilə tanınır. İctimai fəal məişət zorakılığından əziyyət çəkən qadınlar üçün “Sapla” tikiş evi açaraq, onlar üçün iqtisadi cəhətdən sərbəstlik əldə etmək imkanı yaradıb. Mayın 30-da Beynəlxalq Feminizm Günündə Məmmədovanın təsis etdiyi tikiş evinin işçilərinin hazırladığı məhsulların sərgisi təşkil edilib. Sərgi ictimai dəstəklə qarşılanıb.
Onu da qeyd edək ki, R.Məmmədova etiraz aksiyalarında iştirak etdiyinə görə dəfələrlə saxlanılıb.