YAP Binəqədi Rayon Təşkilatının keçmiş sədri Ramiz Göyüşovdan hədə-qorxu ilə pul tələb etməkdə ittiham olunan jurnalist Mahir Ələkbərovun (Mahir Xəttab) məhkəməsi yekunlaşıb.
Hakim Azər Tağıyevin sədrliyi ilə keçirilən məhkəmə iclasında jurnalistin vəkili Araz Nurməmmədov müdafiə nitqi ilə çıxış edib. O, Mahir Xəttab barəsində bəraət hökmünün çıxarılmasını istəyib.
Məhkəmə jurnalist barəsində ittiham hökmü çıxarıb. Hökmə əsasən, Mahir Xəttab 3 il 6 ay müddətə azadlıqdan məhrum edilib.
Jurnalist qanunsuz həbs edilməsinə etiraz olaraq aclığa başlayıb.
Bu barədə onun qohumları məlumat yayıb: “Mahir bu gün aclıq aksiyasına başlayıb. O, barəsində çıxarılan hökmün ədalətli olmadığına etiraz edir. İşinə obyektiv baxılmasını istəyir. O, özünü günahkar hesab etmir. Deyir ki, barəsində heç bir cinayət olmadığı halda, sifarişlə ağır cəza təyin olunub”.
Qeyd edək ki, ittihama görə, M.Ələkbərov R.Göyüşovun qeyri-etik videogörüntülərini “Azadinfo.az” və digər xəbər saytlarında yaydıqdan sonra həmin məlumatların yayılmasının qarşısının alınması məqsədil onunla görüşüb, görüntülərin silinməsi üçün 2 min manat pulu hədə-qorxu ilə almaqda təqsirləndirilib.
Mahir Xəttaba Cinayət Məcəlləsinin 182.1-ci (hədə-qorxu ilə tələb etmə) maddəsi ilə ittiham elan edilib.