Avropa Məhkəməsi britaniyalı Tania King, Peter Andrews və ispaniyalı Yolanda Fernadesin Azərbaycana qarşı şikayətləri üzrə qərardadını elan edib.
Bu işdə ərizəçilər 1999-2017-ci illərdə Azərbaycanın həmin vaxtlarda işğal altında olan Azıx mağarasında tədqiqat və qazıntılar aparmış arxeoloqlardır. Onlar mağarada tədqiqatlar apararaq 2016-cı ildə tədqiqatın nəticələrini əks etdirən kitab nəşr etdiriblər.
Ərizəçilərə Azərbaycan ərazilərinə qanunsuz səfər etmək və başqa ittihamlarla cinayət işi açılıb, onların saxlanılıb həbs edilməsinə qərar verilib. İnterpolun Azərbaycan Milli Bürosu ərizəçilər barəsində beynəlxalq axtarış elan edib. Ancaq bir müddət sonra İnterpolun Baş Katibliyi beynəlxalq axtarışın dayandırılmasına qərar verib. Həmin vaxt Azərbaycan Xarici İşlər Nazirliyi ərizəçilərin adlarını işğal olunmuş ərazilərə qanunsuz səfər etdiklərinə görə arzuolunmaz şəxslər siyahısına daxil edib.
Ərizəçilərin 2017-ci ildə barələrindəki hüquqi prosedurlardan birbaşa Avropa Məhkəməsinə göndərdikləri şikayəti Avropa Məhkəməsi daxili müdafiə vasitələrinin tükəndirilməməsi səbəbindən qəbuledilməz sayıb.
Avropa Məhkəməsinə yenidən şikayət göndərən ərizəçilər bu dəfə iddia ediblər ki, daxili müdafiə vasitələrini tükəndirmək üçün Azərbaycanda onları təmsil etməyə vəkil tapa bilməyiblər. Ancaq bununla bağlı hər hansı sənəd təqdim etməyiblər, yalnız Azərbaycan prokurorluğu ilə bəzi yazışmaları təqdim ediblər. Ərizəçilər Avropa Məhkəməsinə göndərdikləri şikayətlərində şəxsi həyata hörmət hüququnun, effektiv müdafiə vasitələri hüququnun və hərəkət azadlığının pozulduğunu bildiriblər.
Bütün hallarda daxili müdafiə vasitələrini tükəndirmənin vacibliyini xatırladan Avropa Məhkəməsi ərizəçilərin işə baxılmasını zəruri edəcək hər hansı sübutlar təqdim edə bilmədiklərini qeyd edərək şikayətin qəbuledilməz elan edib.